Полицияны харкюнлюк ишинден

Хыйлачылагъа кеслерин алдатхандыла

Бир кюнню ичинде республикада хыйлачылыкъ бла байламлы юч аманлыкъ этилгени эсепге алыннганды.

65-жыллыкъ тиширыуну телефонуна ол танымагъан адам сёлешип, банкны къуллукъчусу болгъанын айтханды. Ахчасын уручуладан сакълар ючюн,  счётунда болгъанны  къоркъуусуз ячейкагъа ашырыргъа керекди дегенди. Алай бла тиширыу 650 минг сомун тас этгенди.

 67-жыллыкъ эр киши да бу «ыргъакъгъа» тюшгенди. Ол а жалгъан   банкирге ийнанып, 246,4 минг сом кредит алгъанды эмда «къоркъуусуз счётха» 200 минг сомну ашыргъанды.

 Прималкинское элден 40-жыллыкъ тиширыу а Интернетде мотоцикл сатылгъаныны юсюнден билдириуню кёргенди. Ол аны  алыр мурат бла иесине сёлешип, анга 24,8 минг сомну жибергенди. Алай сатыучу олсагъат   билдириуню кетерип, жууап бермей тохтагъанды.

Право низамны сакълаучула Интернетде сатыу-алыу этген кезиуде сакълыкъны тас этмезге,  товар учуз багъа бла берилсе, ишекли болургъа чакъырадыла. Дагъыда банкны къуллукъчулары телефон бла бир тюрлю операция бардырмагъанларын да эсгертедиле полициячыла.

Сагъатланы багъасы 700 минг сомгъа жетгенди

«Контрафакт» операцияны чеклеринде Черек районну полициячылары аты айтылгъан  фирманы белгиси   законсуз хайырланылгъанын ачылагъандыла. Тюкенледен биринде полициячыла белгили компанияны аты жазылгъан  эки къол сагъат  тапхандыла.  

Тюкенни иесини айтханына кёре, ол товарны Нальчикде танымагъан адамдан сатып алгъанды. Экспертиза фирмагъа 699,4 минг сом къоранч этилгенин ачыкълагъанды.

Черек районда ОМВД-ны келечилери предпринимательге РФ-ни УК-сыны 180-чи статьясыны 1-чи кесегине кёре материалла хазырлагъандыла. Ол башха фирманы товар белгисин законсуз хайырланнганы ючюн терсленеди.

 Талауурлугъу ючюн - тюрмеге

Быйыл 24 июльда Нальчикде УМВД-гъа 64-жыллыкъ тиширыу тарыгъып келгенди. Ол шахарда Идаров атлы орамда аптекаладан бирини ишчисиди. Тиширыуну билдиргенине кёре, аптекагъа бетинде медицина маскасы  бла эр киши чабып киргенди. Аны бичакъ бла къоркъутуп, 5 минг сомун эмда дарман  сыйыргъанды. Алай бла аптекагъа 6,4 минг сом къоранч этилгенди.

Излеу жумушла толтуруп, уголовный розыскны къуллукъчулары ишеклини тохташдыргъандыла. Ол алгъын да сюдню оноуу бла бир ненча кере жууапха тартылгъан 34-жыллыкъ эр кишиди. Анга РФ-ни УК-сыны 162-чи статьясыны 2-чи кесегине кёре терслеу материалла ачылгъандыла – сауутну неда анга ушагъан затланы хайырланып, талауур этгени ючюн.

Бу статьягъа кёре терсленнгенни эркинлиги он жылгъа дери сыйырылыргъа боллукъду.