Казбек Коков Черек районда саулукъ сакълау учрежденияланы ишлери бла шагъырейленнгенди

КъМР-ни Башчысы Казбек Коков Черек районда саулукъ сакълау жаны бла регион программаны биринчи звеносуну жангыртыуу къалай бардырылгъанына къарагъанды.

Ишчи жолоучулукъгъа КъМР-ни саулукъ сакълау министри Рустам Калибатов бла Черек муниципал районну администрациясыны таматасы Муртазланы Борис къатышхандыла.   

Казбек Коков район больницаны поликлиника белюмюню ишине къарагъанды.     

Поликлиникада районда жашагъан 28 мингден аслам адам медицина болушлукъ аладыла. Мекямны 1990 жылда хайырланыргъа бергендиле, аны жери тёрт минг квадрат метрден асламды, шендю жангыртылыргъа керекли кёп заты барды, ол санда инженер коммуникацияларын да алышындырлыкъдыла. Тынгылы ремонтну этерге федерал бюджетден 43,3 миллион сом бёлюннгенди. Къурулушчула мекямны башын алышындыргъандыла, шендю ичинде болгъан отоулагъа ремонт этип башлагъандыла. Битеу ишлени 2022 жылда бошаргъа айтадыла.

Аушигерде саулукъ сакълауну биринчи звеносун жангыртыу программасына кёре, бюгюнлюкде жангы амбулатория ишлене турады.

Казбек Коков бла ушакъда саулукъ сакълау бёлюмде ишлегенле элге эрттеден окъуна жангы амбулатория керегин, ол жарсыуларын ала бир ненча кере айтханларын да чертгендиле. Бу объектни къурулушун жангыртыу программагъа къошаргъа онг чыкъгъанды, аны хайыры бла проблема тамамланады. Элде беш минге жууукъ адам жашайды, эски мекям 1939 жылда ишленнгенди, анда саулукъ сакълауда тамаланыргъа керекли жумушланы толусунлай этерге отоула  жетишмей тургъандыла. Казбек Коков ангылатханына кёре, амбулаторияны къурулушуна федерал бюджетден элиу миллионга  жууукъ  сом бёлюннгенди, аны къурулушу 2022 жылда бошалыргъа керекди деп белгиленилгенди. Шендю ишлене тургъан мекям эски амбулаторядан эки кереге уллуду,  кеси да 586 квадрат метр болады. Къурулушчула бюгюнлюкде къабыргъаланы къалап бошай турадыла, ызы бла мекямны башын жабып башларыкъдыла.

КъМР-ни Башчысы абулатория ишлене тургъан орамны да тапландырыргъа буйрукъ бергенди.

Битеуда саулукъ сакълауда биринчи звенону жангыртыу программагъа кёре, РФ-ни Президенти Владимир Путинни буйругъуна тийишлиликде, Къабарты-Малкъарда 2025 жылгъа дери 13 жангы мекям ишленирикди. Нальчикде Головко орамда сабий поликлиника эм Бахсан районну Дыгулыбгей элинде экинчи поликлиника бёлюм жангыртылынырыкъды. Саулукъ сакълаугъа кирген 25 объектге тынгылы ремонт этилликди.  

Шёндю Нальчикде Хмельницкий орамда орналгъан поликлиниканы тынгылы ремонтуну биринчи кезиую бошала турады.  Жылны ахырына Атажукино элде поликлиникада эм Май районну сабий поликлиникасында жангыртыу  ишле тауусуллукъдула, деп билдиргендиле КъМР-ни Башчысыны бла Правительствосуну пресс-службасындан.