Къонакъладан – саугъала, къонакъбайладан – жырла, тепсеуле

Долинскде «Вершина» санаторийде «Лидер» профильли сменни экинчи къауумуна къууанчлы халда тюбегендиле.  Бери, хар замандача, солургъа эмда саулукъларын  кючлендирирге республиканы тюрлю-тюрлю районларындан  эллиден артыкъ жаш бла къыз келгендиле.

Алагъа жораланнган къууанчлы жыйылыугъа  Россейни МВД-сыны Нальчик шахар управлениясыны таматасыны орунбасары Жантудууланы Залим, сабийлени ишлери жаны бла шахар управленияны начальниги Марита Шорова,  КъМР-де Сабийни  эркинликлери жаны бла  уполномоченныйде  консультант Манияланы Ламия,  КъМР-де МВД-ны  Жамауат советини  председателини орунбасары  Ирина Кишукова эмда  «Айнытыу» жандауурлукъ фондну  жаш тёлю программаларыны координатору Назир Кишуков  къатышхандыла.

Полициячыла къуру къоллары бла келмегендиле, алгъыш эмда насийхат сёзлерин айтып бошагъандан сора,  саугъагъа спорт оюнланы кереклерин бергендиле.

Тюбешиуню кезиуюнде солургъа келген жашла, къызла да жырлап, тепсеп да къонакъланы къууандыргъандыла, ол угъай да, гимнастикадан хунерликлерин  да кёргюзтгендиле. Ахырында уа   отрядлагъа юлешинип, девизлерин туура этгендиле.

Тюбешиу сабийлени  жарыкъ  тепсеулери бла бошалгъанды.