Жууаплылыкъ, къайгъырыулукъ да иги кёрюмдюлеге келтиргендиле

Быйыл мартда Россейни  уголовный-толтуруучу системасы къуралгъанлы  140 жыл толады. Къабарты-Малкъарда уа УИС 1920 жылда ишлеп башлагъанды. Кертиди, андан бери ол кесини атын кёп кере тюрлендиргенди. Анга биринчи болуп  Михайлов, артда  Шишлянников, Колос, Грязнов, Богатов  башчылыкъ этгендиле. 1926 жылда уа аны таматасына Жанхот Тлупов салынады.

Отузунчу жыллада Пятигорск орамда 1-чи номерли колония ачылгъанды. Бусагъатда анда  следственный изолятор барды. 1942 жылда уа  Прохладна районну Советское элинде 2-чи номерли эр киши колония къуралады. Артда, Каменкада къаты низамлы учреждение  ачылгъанда, Советскоедеги битеулю режимлиге айландырылады. Колониялагъа Леонид Любимов, Михаил Шелепов, Безруко Кунашев, Бечелланы Илияс  башчылыкъ  этгендиле. 1992 жылда уа,  Россейде пенитенциар системада болум къатыланнган кезиуде, КъМР-ни уголовный-толтуруучу системасына Ахмет Абидов башчылыкъ этип башлайды. Ол  къысха заманны ичинде ишни тынгылы къурап, учреждениялада халны игилендиреди.

1998 жылда уа  КъМР-де УИС  РФ-ни Юстиция министерствосуну бойсунуууна ётдюрюледи. Ол УФСИН болады. Алай бла ишде да кёп зат тюрленеди. Энчи составны социал жаны бла къоруулауда талай мадар этиледи. Сёз ючюн,   Каменкада  24-фатарлы юй, Нальчикде да  мекям хайырланылыргъа бериледиле. Энчи  медицина эм социал реабилитация ара  ачылады.  Киров атлы санаторийде уа  къуллукъларын бардыргъанла эмда аланы юйюрлери солуп, саулукъларын кючлендирирча этилгенди.

Сёзсюз, ФСИН-ни КъМР-де управлениясында къуллукъ этгенлеге 2005 жыл артыкъда къыйын эди. Ала, болумну ангылап, терк окъуна сауутланып, къатларында болгъан тиширыуланы, сабийлени да  къоркъуусуз жерге элтип, къорууланнгандыла. Жарсыугъа, къуллукъ этгенлени араларында  аманлыкъчыланы къолларындан жоюлгъанла да болгъандыла. Аланы атларын ёмюрлюк этер муратда  управленияны арбазында мермер къанга орнатылгъанды.  

УФСИН-чиле  тюрлю-тюрлю динлени келечилери бла да  къаты байламлыкъда ишлейдиле. 2001 жылдан бери  республиканы Башчысында  Кечиу жаны бла  комиссия ишлейди, Жамауат совет барды. Республиканы жеринде 8 колония къуралгъанды.  Жылдан-жылгъа  алада  болум иги жанына тюрлене барады. Ала  тынгылы видеотехника бла да жалчытылынадыла.  Дагъыда эл мюлк продукция чыгъарыу кенгертиледи. Ёсдюрюлген  кёгетлени, жемишлени жарашдырырча  печьле, холодильникле да алыннгандыла. Тюрлю-тюрлю  ишчи жерле къураладыла,  жаланда  арт жыл бла жарымны ичинде жюзден артыгъы ачылгъанды. Алада  ишлеген  тутмакъланы хакълары да ёседи.  Медицина бла жалчытыу да биле-биле тюрленнгенди.

Тюзетиучю учреждениялада болум таплай турады эмда  администрация алада халны  дайым  къаты контрольда тутады. Иги кесек замандан бери да КъМР-де УФСИН къыралда аллай ведомстволаны араларында  биринчи жерни алгъанлай турады. Бу системада къуллукъ этгенле уа правительстволу саугъалагъа,  ведомстволу майдаллагъа тийишли боладыла.

Холаланы Марзият хазырлагъанды.
Поделиться: