Жангы ие ишни къолгъа алгъанды

Алгъаракъда билдиргенибизча, бизни республикада электрокюч бла жалчытыу ишни «Каббалкэнерго» предприятияны орунуна энди «Россети Шимал Кавказ» компания тамамларыкъды. Анга кёре келир айдан башлап ток ючюн хакъны  экинчисине берирге керекди. Аны специалистлери уа бу кюнледе юй сайын айланып, эсеплеучю приборланы кёргюзтюулерин жазып аладыла.

Компанияда айтханларыча, бу ишни ала предприятиялада бла организациялада да бардырадыла. Кёргюзтюулени тюз болгъанларына бла къалгъанларына кёре артда тёлеулени тийишдирген да женгилирек боллукъду, дегендиле анда.

Быллай приборлагъа энергетикле къачан келип къарасала да, башхалыгъы жокъду, хайырланыучула токну неллай бир кюйдюрген эселе да,  жаланда аны ючюн тёлерикдиле.

Бу ишни компания июльну ахырына дери тындырыргъа керекди. Саулай айтханда, специалистле 153 минг приборгъа къарап чыгъаргъа борчлудула. Кёргюзтюулени ха радам да кеси берирге да боллукъду. Аны уа биринчи августда компанияны бёлюмлеринден бирине сёлешип неда жазып билдирирге тийишлиди.

Предприятияла бла организацияла ол кюнден башлап электрокючню сатыу-алыуну юсюнден жангы келишимле этерге керекдиле. Алада электрокючню сатыучу компанияны аты бла реквизитлери тюрленирикдиле ансы, башха затлары алгъынча къаллыкъдыла. Счётчиклеге къараргъа келгенле хар кимге  да тёлеулени жангы реквизитлерин  билдирликдиле.