Миллет проектле бла байламлы ишлени эсеплери чыгъарылгъандыла

КъМР-ни Правительствосунда Къабарты-Малкъар Республиканы  Башчысында Стратегиялы айныуну эмда миллет проектлени советини президиумуну талай жыйылыулары бардырылып бошалгъандыла. Алада КъМР-де миллет проектлени толтурууну барыу халлары туура этилгендиле, 2021 жылны экинчи кварталыны эсеплери чыгъарылгъандыла.

Хар проект энчи халда сюзюлгенди, баш магъаналы ишле къалай тындырылгъанларына къаралгъанды. Алайды да, миллет проектлеге кёре Къабарты-Малкъарда 41 регион проект жашауда бардырылады.  Федерал бюджетден республиканы бюджетине 27 регион проектни толтуруугъа субсидияла бериуню юсюнден 43 келишим къабыл кёрюлгенди.  Конкурсланы ётдюрюу эмда къырал, муниципал келишимле этиу жаны бла иш андан ары къыстау бардырылады.

2021 жылда республикада миллет проектледе белгиленнген ишлеге 7 647,51 миллион сом бёлюнеди. Аны 5 853,32 миллион сому федерал бюджетденди, 1 794,20 миллион сому уа – республиканыкъындан. Ол ахчаны 3 410,43 миллиону  неда 44,6 проценти хайырланылгъанды.

Регион проектлени чеклеринде быйыл 90-дан аслам  объектни ишлерге эмда жангыртыргъа белгиленеди. Анга 3 190,3 миллион сом бёлюннгенди. Бюгюнлюкде 12 объект хайырланыргъа берилгенди, дагъыда 77-си жылны ахырына битерикдиле. Андан сора да, арбазладан бла жамауат тийреледен 122-син тапландырыргъа, грант къытхан «Чегем парк» проектни тамамларгъа белгиленеди. Алагъа 297,9 миллион сом бёлюннгенди.

Жыйылыуланы эсеплерине кёре, регион проектлени кураторларына бла башчыларына миллет проектлени тамамлаугъа ахчаны хайырланыуну тирилтирге эмда тийишли жумушланы толтурууну жалчытыргъа буюрулгъанды.