Жууаладан ууланмазча неге эс бурургъа керекди?

Жууала ауур ашха саналадыла. Ала ауурлугъу болгъан тиширыулагъа, сабийлеге да жарашмайдыла. Не къадар биширгенликге, къалай хазырлагъанлыкъгъа да башхасы жокъду, дейдиле Роспотребнадзорну Къабарты-Малкъарда управлениясында.

Бу затладан ууланыу бек къоркъуулугъа саналады. Кеси да саулукъгъа башха (бузулгъан) ашладан эсе уллу хата салады. Сабийлеге, абаданлагъа уа бютюнда къоркъуулуду. Аны барыны да баш сылтауу уа – ашха жараулу жууаланы - айыра, бирсилерин а хазырлай билмегениди.

Эсигизде болсун, жууаланы ашаргъа жараулу тюрлюлеринден окъуна келирге боллукъду къоркъуу. Нек дегенде, ала экология жаны бла осал тийреледе, сёз ючюн, промышленность предприятияланы къатларында, жолланы жанларында ёсгенде, хауадан, суудан, жерден уулу затланы кеслерине аладыла. Ол а къоргъашин, гинасуу, кадмий дегенча аллай ауур темирледиле. Ала адамны саулугъуна айтып айтмазча хаталыдыла.

Бу ашарыкъны хазырлаугъа бек уллу магъана берирге тийишлиди. Ол кеси да эм биринчиден ботулизмни профилактикасы бла байламлыды. Бу аман ауруу адамны нерва системасын бузады, ызы бла солууун тыйып жашауун юзеди.

Анга ууланнганны биринчи белгилери 1-4 сагъатны ичинде кёрюнюп тебирейдиле. Асламысында уа бир-эки кюнню ичинде чыгъадыла. Уулу неда тапсыз биширилген жууаланы ашагъан адамны аш оруну къыйнап башлайды, къолу, саны тюшеди, башы ауруйду, ауузу къургъакъ болады. Ызы бла кёлю аман этип тебирейди, юсю исси болады, ичи ачып, къусуп башлайды. Адамны кёзлери осал кёрюп, ауазы чыкъмай, абери жуталмай, абын-сюрюн атлап башлагъаны бла ауруу нервалагъа жетгени белгили болады. Бу ышанланы къайсыларын да эслесегиз, мычымай врачха барыргъа керекди. Аны оздурса саусуз солууу тыйылып ёллюкдю.

Жууаладан ууланыуну профилактикасына бек сакъ болугъуз! Эм биринчиден аланы жаланда билген, къоркъуусузлу тюрлюлерин, кеслерин да жолладан, элледен узагъыракъ жерлеге барып четеннге жыйыгъыз. Ишекли эсегиз, чий жууаны къабып кёрмегиз. Аны аман ийис этген, татыуу ачы болгъан тюрлюлери ашха не хазна жарасынла. Башында айтылгъаныча, быллай ашны сабийлеге, саулукълары осал болгъанлагъа да бермегиз.

Жыйып, юйге келтиргенлей, аланы айырыргъа эмда жууаргъа керекди. Не аз да ишеклик туудургъан, дагъыда къуртлу, хыра, артыгъы бла бишген жууаланы бир жанына атыгъыз. Къалгъанларын а ол кюн окъуна биширигиз. Кеслерин да къайсы тюрлю болгъанларына кёре башха-башха.

Бу ашарыкъланы сатып алама десегиз а рыноклагъа неда тюкенлеге барыгъыз. Продукцияны оруну тешилгенин, аны юсюнде къабугъу неда бир тюрлю информациясы болмагъанын кёрсегиз – алмагъыз. Юйде жарашдырылгъан консерваланы уа унутугъуз. Аладан ууланыргъа, ботулизм бла аурургъа да боллукъду.

Улбашланы Мурат хазырлагъанды.
Поделиться: