Киевни азатлагъанды, Сталинград ючюн сермешгенди

Биз хар эрттен сайын чууакъ кюнню жарыкълыгъына къууанабыз. Тёгерекде гюлле чагъадыла, терекле жашилленедиле, чыпчыкъла жырлайдыла. Жылыды, ариуду, ырахатлыды…

 Тюз да аллай кюнлени биринде, жетмиш тогъуз жыл  мындан алгъа Асанланы Жамурзаны жашы Мухадинни  аскерге аладыла. Бир жылдан а Уллу Ата журт уруш башланады.  Атасы уа жашы  къайтыргъа къурманлыкъ къой асырап тургъанды. Анасы уа,  элде бек ариу къызгъа кёз жетдире, келин сайлагъанды…

 Мухадин, анга дагъыда Мухаш дегендиле, Киевни азатлаугъа къатышханды, Сталинград ючюн да кесин аямай сермешгенди. Эки кере жаралы  болгъанды. Алгъа  кесине бакъдырып,  биягъы бёлюмге къайтханды. Артда уа бек ауур жаралары бла госпитальгъа  тюшгенди. «Анда ишлеген уста врачла болмасала эдиле, мен не хазна  сау къалыр эдим»,-деп  эсгериучю эди атабыз. 1944 жылда уа аны, аскерде къуллукъ этерге жарарыкъ тюйюлдю деп, юйге жиберип къойгъандыла.  Жарасыны хатасындан кёзлери кёрмей къалгъан эдиле»,- деп хапарлайды къызы Нажабат.

Фронтда болдургъан жигитлиги ючюн  Асан улу Ата журт урушну биринчи даражалы орденине, Жуковну майдалына эмда кёп башха белгилеге тийишли болгъанды.

-Уруш жылланы юсюнден бир хапар айтсанг а деп тилесек, олсагъат хали тюрленип къалыр эди. Сёз айтмай, тынгылауну басып, башын энишге бошлап, иги кесек турур эди.  Аллай сагъатларында аны бетине къарагъан къыйын болгъанды. Баям, урушда кёрген ачылыкъ, тас этген нёгерлери, дагъыда кёп башха затла да акъылын бийлей болур эдиле,-дейди къызы.

  Орта  Азияда Мухадин Бёзюланы Бийнёгерни къызы  Айшат бла   юйюр къурайды. Ала бир бирлерин ангылап, кёп жылланы жашагъандыла, тёрт къыз да ёсдюргендиле. Къалай бек сюе эди ол аланы,  артда уа аладан туугъанланы да. Туудукълары да аппаларын къубултур ючюн къалмагъандыла.

Огъурлу адамны элде да намысы бийик жюрюгенди. Жашауда уа, жарсыугъа, хар зат да сюйгенингча сыйдам болуп бармайды. Сёзсюз,  къыйын кезиуле да болгъандыла. Къалай термиле эди ол сабийлерини, туудукъларыны бетлерин, кёзлерин кёрюрге. Алай  эсли  таулу киши кёлсюзлюк этмегенди бир заманда да, игиликге  ийнаннганын да къоймагъанды. 

  Аныча ата,  аппа бла ким да ёхтемленирик эди.  Аны жууукълары бла ахлулары да бек сыйлы кёргендиле. Ол Уллу  Хорламны  62-жыллыгъына бир ай къалып, 2007 жылда дуниясын алышханды.  Байрам кюн а Мухадиннге  не заманда да уллу къууанч эди. Къызлары, аладан туугъанла да аны алгъышлай келселе, ол аланы  кесине къаты къысып къучакълагъанды.

Жыл сайын  9 Майда сабийлери туугъан журтларына жыйылып, аталарын эсгередиле. Онбешжыллыкъ Мисирланы   Лейля уа аппасыны юсюнден хапар  жазгъанды: «Анычала бизни эркинлигибизни къоруулагъандыла, зулмулукъдан  къутхаргъандыла, биз ала келтирген Хорламгъа  кертичи борлургъа борчлубуз. Аппам бла ёхтемленеме, аны аллында баш урама».