Вакцинация этдирирге сюйгенлеге къошула барады

КъМР-ни Саулукъ сакълау министерствосундан билдиргенлерича, бюгюнлюкде республикада коронавирусдан дарман салдырыргъа сюйгенлени санына иги кесек къошулгъанды. Аланы  кёбюсю жаш адамла болгъанлары уа  бютюн къууандырырча шартды.

-  Къабарты-Малкъарда жашагъанланы арасында   дарман салдыргъанланы саны  кёпден- кёп бола  барады.  Сёз ючюн, ал заманлада вакцинациягъа бир ыйыкъгъа  минг  адам кючден жыйылыучу эсе,   энди уа  бир суткагъа  минг бла жарым келедиле. Анга арт заманда  жаш адамла да  тири къатышадыла, ол санда ахлуларын да  келтиредиле. Пациентлени санына артыкъ да кёп   июль айда къошулгъанды. 

Алай бла бюгюнлюкде республикада вакцинацияны 89 237 адам ётгенди. Ол санда 48 773 инсан  экинчи кере этилгенледиле. Болумну тюзеле баргъанына  керти  хапар билдирип тургъаны  да уллу себеплик этеди.

Республикада вакцина жетерча  барды.  Жамауатны кёбюсю «Спутник V» препаратны сайлайдыла, алай бир-бирде къолда аз болгъан  «Ковивакны» салдырыргъа излегенлеге  да аллай онг   тапдырылады.  

Эсге сала айтсакъ, бусагъатда республикада   коронавирусдан бир жолгъа   632 саусузгъа  багъарча    юч госпиталь  ишлейди.  Алада  509 терапия эм 65 реанимациягъа жер барды. Вакцинацияны район аралы больницалада, эллени амбулаторияларында ётерге жарайды. Кёп болмай бу жумушну тамамларча   жерле Азау талада бла «Бызынгы» альплагерьде да ачылгъандыла.

Магометланы Сулейман.
Поделиться: