Казбек Коков: Республикада жашагъанланы саулукъларын бла жашауларын сакълау шёндю бизни баш борчубузду

Къабарты-Малкъарны Коронавирус инфекцияны жайылыууна къажау кюреш бардырыу жаны бла  оператив штаб республиканы Баш къырал санитар врачы Жирослан Паговну  бу жангы жукъгъан ауруудан сакъланыуну мадарларын бютюн кючлендирирге эмда ишлегенлени бир къауумуна вакцинацияны борчлу халда салдырыргъа кереклисини юсюнден оюмун къабыл кёргенди.  

КъМР-ни Башчысы Казбек Коков регионда  эпидемиология болум осалдан-осал бола баргъанын чертгенди. «Госпитальлада бусагъатда 534 адам жатады, аладан 71  реанимациядадыла. Ауругъанланы санына кюн сайын къошула барады, сабийле, жаш адамла да ауруйдула. Ала да аны къыйналып кётюредиле. Биз реанимациялада ундурукъланы кёбейтебиз, кислород бла къошакъ халда жалчытабыз, башха госпитальланы да хазырлай турабыз. Алай кёп кезиуледе бу ауруу терк окъуна къыйыннга айланып къалады, ёлгенле да асламдыла», -дегенди.

 Казбек Коков Къабарты-Малкъарда жашагъанланы саулукъларын бла жашауларын сакълау шёндю бек баш борч болгъанын да эсгертгенди. «Бюгюнлюкде кесибизни эмда тёгерекдегилерибизни къоруулауну жаланда бир амалы барды – ол вакцинацияды. Аны къысха заманны ичинде бардырып, дарманны не къадар кёп адам салдырырча эмда аурууну жайылыуун тохтатырча этерге керекбиз»,- дегенди ол.

Борчлу халда вакцинация этдирирге халкъны жумушларын жалчытыуда, сатыу-алыуда, къырал эм муниципал къуллукълада, транспортда, билим бериуде, культурада, саулукъ сакълауда, ЖКХ-ны организацияларында, къурулуш, туризм эмда социал бёлюмледе, социал къоруулауда  ишлегенле, керек боллукъдула.

 Оператив штабны жыйылыууну эсеплерине тийишлиликде Роспотребнадзорну КъМР-де Управлениясыны энчи сайтында Къабарты-Малкъар Республиканы Баш къырал врачыны «Гражданланы бир къауумуна эпидемиялы кёрюмдюлеге кёре профилактика халда дарман салдырыуну юсюнден» бегими басмаланнганды   Эпидемиология болум республикада осалгъа саналады,  деп айтылады документде. Адамла кёп жыйылгъан жерлеге терк-терк барыучуланы эмда жамауат транспорт бла жюрюгенлени арасында ковидден ауругъанланы саны ёседи. Аллай саусузланы асламысы (71 проценти) ишге жараулу жыл сандадыла – 18 жылдан 60 жылгъа дери. Больницадан тышында пневмониядан ауругъанланы саны да азаймайды, госпитальлагъа тюшгенле кёпден-кёп болуп барадыла.

Бегимде битеу организацияланы башчыларына, ала не тюрлю форма бла ишлегенлерине да къарамай, 10 августха дери ишчилери вакцинацияны биринчи кере, 1 сентябрьге дери уа экинчисин да этдирип бошарча мадарла этерге буюрулады. Бу бегим коронавирус инфекциядан прививка этдирирге жарамагъан инсанлагъа къатылмайды.

Къабарты-Малкъар Республиканы Правительствосуна халкъгъа дарман салдырыу жаны бла ишни тынгылы тындырыуну жалчытыргъа кереклиси эсгертилгенди.