Намысны, сюймекликни эм башха салып

Кёп болмай Элбрус муниципал районну администрациясында Юйюрню байрамына жоралап, юлгюлю юйюрлени саугъалагъандыла. Аны юсюнден бизге муниципалитетни администрациясыны пресс-службасындан билдиргендиле.

Къууанчлы жыйылыуну администрацияны башчысыны къуллугъун толтургъан Сотталаны Къурман бардыргъанды. Саугъаланнганланы санында "Жылны юйюрю-2021" конкурсну регион кесегинде «Юйюр- тёрелени сакълаучусу» деген номинацияда хорлагъан Этезлары да болгъандыла.

Этезланы Азнор бла Зульфия  бюгюнлюкде юч къыз ёсдюредиле. Азнор  «Асыл-Суу» чабакъ фермада  оператор болуп ишлейди, Зульфия уа онсегиз жылны ичинде Тырныауузда Мокъаланы Магометни атын жюрютген Сабий эм жаш тёлю чыгъармачылыкъ арада урунады. Тамата къызлары Милена, Нальчикде «Призвание» медицина колледжни къызыл дипломгъа бошап, «СМD-MED» медицина клиникада жерин тапханды. Фарида бла Фатима уа Тырныауузну 3-чю номерли орта школуну алтынчы эм ючюнчю классларында  окъуйдула.

Юйюрде бир бирге намыс этиу, ышаныулукъ, сюймеклик да баш жерни аладыла. Къызла билимли болур ючюн ата-ана да кючлерин аямайдыла. Андан болур, Милена школну «бешлеге» бошагъанды, ГТО- дан алтын белги алгъанды.  Фарида бла Фатима да, андан артха къалмазгъа кюреше, иги окъуйдула.  Ала спорт эм чыгъармачылыкъ жаны бла да кружоклагъа тири къатышадыла, тюрлю-тюрлю конкурслада эм эришиуледе да жетишимле болдурадыла. 

Этезлагъа мындан арысында да насып эм жангы жетишимле тежейбиз! 

Магометланы Сулейман.
Поделиться: