Ийманы, тёзюмлюлюгю ючюн саугъа чексиз болгъанды⠀

Файгъамбарланы юслеринден хапарла⠀

Сыйлы Къуранда къадары «тёзюм» деген сёз бла байламлы адам сагъынылады. Тёзген   къыйын болгъанын  хар бирибиз да ангылайбыз, жарсыулу болумда женнгиллик  этип, ызы бла ненча кере сокъураннган болурбуз…⠀

Алайды да, ол адамны аты Айюбду. Ол Аллах уталаны келечисиди, файгъамбарыды. Кеси заманында жашагъан адамлагъа бизни Жаратханны сёзюн, аны тюзлюлюгюн, деменгилилигин  белгили этип тургъанды.  Аллаху тала анга саны-чеги болмагъан байлыкъ, ариу юй бийче, сабийле да бергенди. Айюбну жайлыкъларында малла кютгендиле, хар жылдан ол сабанларындан бай тирлик жыйгъанды. Бизни Жаратхан анга саулукъ, кюч-къарыу  да бергенди, башхача айтханда, насыплы жашау этерге неси да болгъанды аны. ⠀

Бирле байлыкъ, багъалы машинала, уллу юйле алагъа жашауларыны ахырына дери саугъаланнган сунадыла. Алай ала башланнган ишни, эртте-кеч болса да, ахыры жетеригини  юсюнден сагъыш этмейдиле. Битеу байлыкъ, ырысхы да Аллахуталаданды,  алай ол бергенни болжалы барды. Ахча, юй, саулукъ, сабийле – ала барысы да бир заманда бошаллыкъдыла. Заман жетсе уа, Аллах утала ол берген мюлк къайры кетгенин, саулукъну, ахчаны къалай къоратханыбызны сорлукъду. ⠀

Айюбну сабийлери саулукъда, ачлыкъ сынамай ёсгендиле. Файгъамбар быллай насып ючюн Аллаху талагъа шукурла этгенден бошамагъанды. ⠀

Сабий бизни Жаратханны адамгъа эм уллу саугъасыды. Аланы саулукълу ёсгенлеринден уллу къууанч бармыды. Аны бла бирге уа сабийле да ата, ана бла бирге ёсген уллу насып болгъанын ангыларгъа керекдиле. Шёндюгю дунияда ненча ёксюз, толу болмагъан юйюрде ёсген бала барды. Хар бирибиз да Аллах уталагъа атаны, ананы кёралгъаныбызгъа, аланы сёзлерине тынгылаялгъаныбызгъа шукур этерге, ыразылыгъыбызны айтыргъа борчлубуз.⠀

Айюбну къадары ырахматлы болгъанды, алай  ол кеси, не юйюрю быллай жашауну ахыры жетгенин, Аллах утала алагъа уллу сынау хазырлагъанын алыкъа билмей эдиле.  Бир жыл тирлик ёсмей къалады, алай бла малланы ашы тауусулады. Айюбну байлыгъы бузча эрип башлайды. Адамла аны кёрюп, файгъамбарны сёзюн этип тебирейдиле. Аллах утала  келечисине ыразы тюйюлдю, анга быллай сынаула берген эсе, деп тохтайдыла. ⠀

Айюб къадалып кюрешгенликге, байлыгъын сакълаялмагъанды. Аны ахчасы ашха-суугъа да жетмей башлайды. Алай бу кезиуде да файгъамбар чамланмагъанды, бизни Жаратханнга алгъынча баш уруп, табынып тургъанды. ⠀

Ызы бла аны  андан да ауур сынаула сакълагъандыла. Айюб жюрегинден сюйген сабийлери бири бири ызындан ауруп  ауушадыла, атаны бла ананы жюреклеринде ачыкъ жарала къоя. Бираздан аны кесини саулугъу да осал болады, санлары тепмей башлайдыла.  Алай юйю сабий къууанчсыз къалгъанда да, ол Аллах уталагъа  чамланмагъанды, ачыуланмагъанды. ⠀

Айюбну юй бийчеси сабыр, акъыллы тиширыу эди, эрине байлыкъда, жарлылыкъда да билеклик этгенди. Юйюр быллай къыйын болумгъа тюшгенде, ол эрине  болушур мурат бла ишге киреди. ⠀

Ийманы болгъан адам сынаугъа тюшсе, Аллах уталадан тилек этеди, анга къыйынлыкъладан къутулургъа тёзюм, кюч-къарыу тилейди.  Ма Айюбну юй бийчеси да: "Аллахдан санга саулукъ беририн тиле",-деп юйретеди. Ол а анга: "Биз жарлылыкъда байлыкъдан бла ауруудан аз заманны жашайбыз",-деп жууаплайды. Аны магъанасы: Аллахутала берген сынау ала бу кюннге дери кёрген ырахматлы жашауну бир бюртюгюн да тутмайдыла. ⠀

Бир кюн Айюбну кёре къарындашлары келедиле. Аны жарсыулу болумун кёрюп: "Айюб дуния башында бир адам да болдурмагъан гюнях этген болур!   Аллахутала 18 жылны ичинде аны ючюн кечмейди келечисин",-дейди аладан бири.  Файгъамбаргъа быллай сёзлени эшитген къыйын болгъанды. Ол кёп жылланы тёзюп турады, аны ючюн а халкъ аны харам адамгъа санайды.⠀

Айюбха дери, андан сора да Аллахутала келечилерине быллай сынаула бермегенди. Аны ючюн ол эки къолун кёкге кётюрюп, быллай тилек этгенди: "Керти да мен уллу палахха тюшгенме  Алай сен  Кечиучюсе!" (Аль-Анбийа (Пророки) сура,  83-й аят).⠀Аллах  Айюбха жууаплап, аягъынг бла жерни ур, деп буюргъанды. Аны толтургъанлай, жерден суу чыкъгъанды. Ол файгъамбаргъа саулугъун къайтаргъан сейир дарман эди. Ол биягъы саулукълу, ариу, жаш адам болгъанды. Ызы бла Аллахутала аны юй бийчесине да къайтаргъанды ариулугъун. ⠀

Айюбну бай заманында мирзеу жыйгъан эки мекямы бар эди.  Аллах булутла жиберип, алтын эм кюмюш жауун жаудурады.  Къыйыры-чеги болмагъан хазна мекямланы толтургъанды. Кёкден алтын  жаугъанын кёрюп, Айюб аны этегине жыйып тебирейди. Ол кезиуде Аллахутала, мен сени бу жумашдан эркин этмедимми, деп сорады. Келечиси уа: "Сени ырахматлыгъынгдан адам къалай тоярыкъды",- дейди. Алай бла ол байлыкъны сакъламагъанын, алтын  бизни Жаратханны анга сюймеклигини шагъаты болгъанын билдиргенди. Алтын бла кюмюш ⠀Аллах утала келечисине ыразы болгъаныны белгисиди, аны ийманы,  тёзюмлюлюгю ючюн  саугъасыды.⠀

Аллахутала Айюбха бла юй бийчесине сабийле да бергенди. Юйде жангыдан сабий къууанч эшитилип башлайды. Аллахуталаны  ырахматлыгъы бла Айюб, юй бийчеси бла бирге кёп жылланы насыпда, сюймекликде жашагъандыла. Ала халкъда чомартлыкълары, жандауурлукълары, ахшылыкълары бла атларын айтдыргъандыла. Жашауларыны ахырына дери Аллахуталагъа табынып, аны сыйлап тургъандыла. ⠀

Къуранда Айюб файгъамбарны юсюнден былай айтылады: "Биз кёргенбиз, ол тёзюмлю къулларымдан болгъанды. Кертиди, болушлукъну къуру бизден излегенди".⠀

Я Аллах, бизге да Айюб файгъамбарны тёзюмлюлюгюню бир  кесигин окъуна бер саугъагъа! ⠀

Басмагъа Тикаланы Фатима хазырлагъанды. ⠀
Поделиться: