Къыраллыкъны тохташыууну, жангы тарыхыны, Ата журтубузну ёмюрледен бери келген жашау жолуну белгиси

12 июнь – Россейни  кюню

2002 жылдан бери   12  июнь Россейни кюнюча белгиленеди,   ол РФ-ни жалынчакъсызлыгъыны декларациясы къабыл этилгенини белгисиди. 

Россейни кюню  бек жаш байрамладан бириди,  алай аны ючюн магъаналылыгъын тас этмейди. Ол Россей Федерацияны къыраллыгъыны тохташыууну, аны жангы тарыхыны, Ата журтубузну ёмюрледен бери келген жашау жолуну  белгисиди.

 Бюгюнлюкден бу байрамгъа эркинликни, жалынчакъсызлыкъны, граждан мамырлыкъны, законланы бла тюзлюкню мурдорунда къуралгъан келишиулюкню шартынача къарайдыла. Хар жылдан да патриотизм ёсгени бла бирге, ол  миллет бирликни, Россейни бюгюннгю жашаууну эмда келир кюню ючюн жууаплылыкъны белгиси болгъанлай барады.

 Аны тарыхыны юсюнден айтханда уа,  1990 жылда 12  июньда РСФСР-ни халкъ депутатларыны съездинде РСФСР-ни жалынчакъсызлыгъыны юсюнден декларация къабыл кёрюлген эди. Ол кезиуде къыралыбыз кёп сынауладан, къыйынлыкъладан, къужур ишледен ётгенди. Болсада декларация   жангы къыралыбызны мурдор ташын салгъанды. 

Анда белгиленнгенича, къырал эм жамауат жашау  бла байламлы оноула этилгенлеринде, битеу полномочияла да РСФСР-ни  кесине берилгендиле.   Конституция  эмда законла  башчылыкъ этгенлери тохташдырылгъанды. Декларация  инсанлагъа, политика партиялагъа, жамауат организациялагъа да  тенг эркинликле, онгла тохташдыргъанды. Андан сора да законла чыгъарыучу, аланы толтуруучу эм сюд органла бир бирлеринден айырылгъандыла, автоном республикаланы, областьланы, округланы, крайланы эркинликлери кенгертилгендиле. 

Россейли къыраллыкъны кючлеуге уа аны аты Россей Федерациягъа тюрлендирилгени, жангы Конституция къабыл кёрюлгени эмда къырал символика тохташдырылгъаны да себеплик этгендиле. Жалынчакъсызлыкъны юсюнден декларация жарашдырылгъаны бла Россейни тарыхыны жангы кезиую, таза бети башланнганды.

 Ал кезиуде адамла бу байрамгъа артыкъ уллу эс бурмагъандыла. Ол угъай, озгъан ёмюрню 90-чы жылларыны ахырында   12  июньда къыралда не зат белгиленеди деген соруугъа адамланы асламы жууап оуна бералмай эдиле.

Бир тёрт-беш жыл мындан алгъа  адамла бу кюнню байрамныча артыкъ бек белгилемегендиле, анга жаланда солуу кюннгеча къарап къойгъандыла. Он жыл мындан алгъа халкъны кёбюсю алгъыннгы СССР чачылып, Россейни жалынчакъсызлыгъыны юсюнден декларация къабыл кёрюлгенин  терс ишге окъуна санап, анга къажау болгъанларын айта эдиле.

Бюгюнлюкде уа жамауатны асламы ол оноу къыралыбызгъа хайыр келтиргенин белгилейдиле.  Ол а патриотизм ёсгени, жаш адамланы туугъан журтубузну сюерге, аны багъаларгъа юйретгенлери бла байламлыды.

Шёндюгю аты уа Россейни кюнюне 2002 жылда 1  февральда Урунуу кодекс къабыл кёрюлгенден сора берилгенди. Ма андан бери ол битеу субъектледе да къууанчлы халда белгиленип башлагъанды.

  Россейни кюнюню  магъаналылыгъыны юсюнден энчи айтыр кереклиси да болмаз. Ол бизни деменгили къыралыбызны халкъын бирикдирирге, ата журтубуз бла ёхтемленирге, къарыулу, айныгъа, уллу атламла бла алгъа баргъан къыралны гражданлары болгъаныбызны сезерге онг береди.

Бу къууанч Россейча кёп миллетли къыралда адамланы биригирге, халкъланы арасында шуёхлукъну кючлерге керекди.  Ол бизни энчиликлерибизни, миллет сезимибизни сакъларгъа, айнытыргъа да онг берилгенини белгисиди.  Шёндюгю дунияда, тыш къыралла бизге къажау болгъан, къыралыбыз кюч алып, аягъы юсюне болуп баргъанын сюймей, бизге  чырмаула этилген заманда уа  байрамны  магъансы бютюнда ёседи.  

Тикаланы Фатима.
Поделиться: