Жемиш тереклени тозуратхан къурт

Терек бахчаланы онгларын алгъан, заран салгъан аз зат жокъду. Тюрлю-тюрлю битим аурууланы, къурт-къумурсхаланы саны уллуду. Бирлери тереклени ёсюмюн тыядыла, къурутадыла, башхалары уа алманы неда кертмени къабугъун тешип жукъгъа жарамазча этедиле.

Быллай заранлы затладан бири калифорниялы щитовкады. Россельхознадзорну Къабарты-Малкъарда управлениясында белгилегенлерича, ол жемиш тереклеге бек уллу хата салгъан къуртха саналады. Аны ёсюмю артыкъ уллу тюйюлдю. Ол кеси да къышны терекни бутакъларына жабышып чыгъады. Тишиси жаз башында юч жюзге жууукъ къурт табады. Ала да аналарындан айырылып, терекни къабугъуна жабышып, жерлеринден тепмей алай жашайдыла. Жылны ичинде тёрт кере тёлю берирге боллукъду ол.

Щитовка терк эм аслам жайылгъаны ючюн табийгъатда анга жау болгъан хазна зат жокъду. Ол ашны артыкъ айырмайды, бутакълада, жемишледе, чапыракълада орналады. Терекни сууун сыпхара кетип, ызы бла аны ёсюуюн тыяды. Аслам къурт басханда, ол тирлик бермей да къояды. Не аз сууукъ къакъгъанда уа, ёлюрге да боллукъду. Аны себепли щитовкагъа къажау иш бек магъаналыды.

Специалистле айтханларына кёре, аны терек чирчик этип башларны аллында бардырыргъа керекди. Кесин да тийишли дарманла себип алай. Аны заманы уа кече хауаны жылыулугъу тёрт градусдан энишге тюшмей тебирегенде башланады.

Бу ишде асламысында къурамларында фосфорорганика болгъан препаратла хайырланыладыла. Ала бла тереклени саулай мылы этерге керекди. Ансыз къуртла бары да къырылырла деп ышаныу азды.