Эки районну араларында шуёхлукъ, къарындашлыкъ халла кючленедиле

Жаз башыны биринчи кюнлеринде  Зольск районну  чыгъармачы коллективлери   Къашхатауда къонакъда болгъандыла эмда маданият юйде   уллу концерт  кёргюзтгендиле. Ол байрам  муниципалитетлени араларында бирге  ишлеу жаны бла  келишимге къол салыннганлы бир жыл толгъанына жораланнганды.

Къарындаш   районну  оноучуларыны атындан  черекчилеге  къызыу салам берип,  Зольск районну  администрациясыны башчысыны орунбасары Исмаил  Докшоков  сёлешгенди.  «Быллай тюбешиуле бек магъаналыдыла, ала  Къабарты-Малкъарны халкъларыны араларында  мамырлыкъны, бир бирни ангылаулукъну, бирге ишлеуню, келишиулюкню да   кючлендириуге уллу себеплик этедиле»,-дегенди ол.

Байрам   къашхатаучуланы "Черек район", къонакъланы уа   "Туугъан  Зольск  жерим" деген жырла бла    ачылгъанды. Андан сора къараучула  хар сахнагъа чыгъгъаннга жарыкъ эмда толкъун къарсла бла тюбегендиле. Концерт баргъан    эки сагъатдан артыкъ заман  эки такъыйкъа кибик ётгенди.

Ахырында  Черек районну администрациясыны  башчысыны биринчи орунбасары  Глашланы Артур къонакълагъа аламат байрам къурагъанлары ючюн  жюрек ыразылыгъын билдиргенди. «Келишимге къол салыннган  кюнден бери озгъан жылны ичинде  керти да кёп эмда магъаналы жумушла  тамамланнгандыла. Бирге тюрлю-тюрлю спорт эм маданият ишле бардырылгъандыла. Алгъаракълада уа биз  уллу  Зольск район куралгъанлы 95-жыллыгъыны  къууанчларына бек сюйюп къатышханбыз. Хар тюбешиуюбюз  бизни  бютюн жууукълашдырадыла»,-дегенди.  

Зольск районну маданият бёлюмюне  черекчиле  саугъа да бергендиле.  Дагъыда къонакъланы хар бирине бу тау ауузну юсюнден хапарлагъан, суратлары бла  гитче китапчыкъла юлешгендиле,  Шимал Кавказны жаухарына саналгъан Чирик кёлню жагъасына элтип, таулу хычинле, айран бла да  сыйлагъандыла. 

Келир тюбешиу энди майда зольскечилени  жеринде  боллукъду. Анда уа бизни артистлерибиз  кеслерини эм иги чыгъармачы ишлерин кёргюзтюрюкдюле.