Узакъ ёмюрлю болууну тынч амаллар

Ичгини ахырысы бла къоюу адамны жашауун 28 жылгъа узун этерге боллукъду деп билдиредиле «Express» изданияда Швецияны Каролин институтуну алимлерини тинтиулерине кёре.

Экспертле 20 жылны ичинде Данияда, Финляндияда бла Швецияда ичгичилени жашауларыны узунлукъларын тинтгендиле. Аланы араларында тюрлюю-тюрлю аурууладан ёлгенлени саны иги да кёп болгъанды, жашауларыны узунлугъу уа 28 жылгъа азайгъанды.

Аракъыны адамны чархына зараныны юсюнден врачла дайым айтадыла. Аз ёлчемледе окъуна ол онкология аурууланы къозгъайды, мыйыны терк къартайтады, къаратонлукъгъа келтиреди. Жюрекге бла бауургъа да хаталыды.

Америкалы алимле уа адамны жашауун 10 жылгъа созаргъа болушурукъ тёрт къылыкъны  юсюнден эсгертгендиле. Алай бла кёгетле бла тахта битимлени  азыкъгъа аслам къошаргъа, жарсыуладан бла мугурайып тургъандан къутулуп, жашауда къууанырча кезиулени ычхындырмазгъа, ичгиден бла  тютюнден кери турургъа тийишлиди.

Жюрекге бла богъурдакъ безге хайырлы азыкъ

Тузланнган чабакъны (сельд) дайым ашау жюрек-тамыр системаны бла богъурдакъ безни ишлеулерин игилендиреди. Анда адамны чархына керекли витаминле, минералла, аминокислотала бла жаула бардыла, дейди врач-диетолог Светлана Фус.

Жангызда бир аллай чабакъда Омега-3 жаулу кислотаны бир-эки кюннге керекли нормасы барды. Бу вещество жетишмеген адамла мудахлыкъдан къыйналадыла, кёллери жарыкъ болуп турмайды. Андан тышында,  Омега-3 терини терк къартайыудан сакълайы, мыйыны бла кёзню сетчаткасына хайырлыды. Аны дагъыда бир ахшы жаны – йодну, селенни бла Е витаминни кёплюгюдю. Ала адамны иммунитети кючлейдиле, эркин радикалланы хатасын азайтадыла.

Диетолог Андрей Бобровский а адамны чархына соханны игилигини сюнден айтханды. Ол витаминлеге, микроэлементлеге бла фитонцидлеге байды, ала уа чархны иммунитетин кётюргенден тышында, аш-азыкъ эритиу, жюрек-тамыр, нерва системалагъа да себеплик этедиле.