Тюрлениулени жамауат къабыл кёрсе, ол кюн окъуна барысы да кючлерине кирликдиле

РФ-ни Конституциясына тюзетиуле бла байламды битеуроссей къол кётюрюу 22 апрельде бардырыллыкъды. Ол солуу кюн боллукъду, инсанла къыралны Баш законуна тюрлениулени юслеринден оюмларын эрттенликде 8.00 сагъатдан ингирде 20.00 сагъатха дери белгили эталлыкъдыла.

Алай бла жамауат законнга тюзетиулени къабыл кёрсе, ол кюн окъуна ала барысы да кючлерине кирликдиле. Ол санда Президентни бир-бир полномочияларыны Федерал Жыйылыугъа берилгенлери да.

Экспертле айтхарыча, тыш къыраллы банклада ахчаларын асыраргъа эркин этилмеген къуллукъчулоаны тизмесине РФ-ни Президенти да кийирилгенди. Ол жаны бла тюзетиуню башламчысы Владимир Путин кеси болгъанды.

26 февральда уа РФ-ни Президенти Конституциягъа тюзетиулени хазырлау жаны бла ишчи къауум бла тюбешгенди. Аны кезиуюнде этилген эсгертиуле 2 мартха дери жыйышдырылып, бир низамгъа келтирилип, Къырал Думаны къараууна берилликдиле.

РФ-ни Конституциясына тюзетиуле жаны бла законорроектни депутатла 10 мартда экинчи окъулууда сюзерикдиле. Ары дери уа сенаторла регионладан келген предложенияланы сюзерге, кеслерини башламчылыкъларын кёргюзтюрге керекдиле.

Эсигизге салайыкъ, РФ-ни Конституциясына тюзетиулени юсюнден законопроектни Россейни Президенти Къырал Думагъа 20 янвраьда бергенди. 23-сюне уа депутатла аны биринчи окъулууда сюзгендиле.

Экинчи окъулууну 11 февральда бардырыргъа белгиленнгенди, алай Думагъа, ишчи къауумгъа къыралны баш законуна предложенияла асыры кёп келгенден, аны апрельге кёчюрюрге тюшгенди.

 Бюгюнлюкде уа Конституциягъа хазырланнган тюзетиулени саны 900-ден асламды.