Жамауат тийрелени тапландырыу барады

Май районда Котляревская станицада Маданият юйню аллында скверде тынгылы жангыртыу ишле барадыла. Муниципалитетни жер-жерли администрациясындан билдиргенлерине кёре, къурулушчула шёндю алайда жангы бордюрла орната турадыла. Узакъгъа созмай асфальт да саллыкъдыла. Ишле бары да «Шахарда тап болум къурау» деген программаны чеклеринде тамамланадыла. Аланы «Л.В.З. – Строй» эм «Сервис+» подряд организацияла тындырадыла. Этиллик мадарлагъа битеуда 859,3 минг сом къоратыллыкъды.

Дагъыда районну ара шахарында – Майскийде, бу программаны хайыры бла орамладан биринде тапландырыу ишле барадыла. «Декор» организацияны къурулушчулары анда хар нени да тынгылы эте турадыла. Ишлени кёп къалмай барын да тындыргъандыла, жаланда шинтикле бла урнала орнатыргъа эмда чыракъланы электрокюч сетьлеге къошаргъа къалгъанды. Проектге кёре,  ишлени биринчи июльгъа дери тамамларгъа керек эди, алай подрядчик аланы бу кюнледе эбине жетдирирге умутлуду.

Эсге сала айтсакъ, келир жыл тапландырыу ишле бардырыллыкъ объектлени (za.gorodsreda.ru сайтда) сайлау бу айны ахырына дери барады. Къабарты-Малкъар ючюн 28 минг адам къол кётюргенди. Ол санда эки мингден асламысы Май район ючюн берилгенди. Анда уа тизмени башында шахарны паркы бла «Пушкинни эмени» сквер турадыла.

 

 

Улбашланы Мурат.
Поделиться: