Бизде чыгъарылгъан рентген аппаратны кёп жерледе сюйюп аладыла

Былтыр Къабарты-Малкъарда тюрлю-тюрлю бёлюмлеге жарарча  оборудование чыгъарыу танг ёсгенди.  Ол санда компьютер, электрон эм оптика техниканы производствосу   145,9 процентге,  электрон  оборудованияны уа  123,1 процентге жетгенди.

Пандемияны кезиуюнде билим бериу,  электротерапия  оборудование, ол санда  маммографлагъа   бла флюорографлагъа  сурам 47,9 процентге ёсгенди.  Аны бла бирге бюгюнлюкде    жангы «Парус» рентген аппаратны производствосу жетишимли  бардырылады.  Бюгюнлюкде ол  Киров, Ростов областьланы, Краснодар, Красноярск крайланы, Башкир,  Тыва,  Шимал Осетия, Чечен  республикаланы эм башха субъектлени рынокларында да кенг белгилиди. 

Андан сора да,  кеси аллына  контроль бардыргъан  аппаратурагъа  сурам  34,2 процентге, компьютерлеге  бла  электрон  эм оптика техникагъа  43,7 процентге   ёсгенди. Болсада   навигация приборла  61,6 процентге эм  полупроводникле да  27,2 процентге аз сатылгъандыла.  Орта эсеп бла алып айтханда,  бёлюмде уруннганланы айлыкълары  25427,3 сомгъа жетеди. Ол былтыр бу заман бла тенглешдиргенде 13,6 процентге кёпдю. Инвестицияланы юсюнден айтханда да,  37,7 миллион сом чакълы  къошумчулукъ этилип,  289,3 процент  кёрюмдюге жетгенди. 

Электрон  оборудованияны арасында  аслам сурам неда  132,4 процент кабель продукциягъа барды.  Болсада электрокюч бла жалчытхан эм контроль бардыргъан аппаратурагъа  сурам - 93,3,тюрлю-тюрлю чыракълагъа - 5,9 эм сигнализациялагъа 37,2 процентге азайгъанды.   Бюгюнлюкде  электрон  оборудованиядан    7901,7 миллион сомгъа  сатылгъанды.  Бёлюмде уруннганланы иш хакълары  19946,9 сомгъа жетеди, ол буруннгу жылдан эсе 5,3 процентге азды. Саулай бёлюмге  5,3 миллион сом багъасы инвестиция келгенди.  

Машиналадан  бла  оборудованиядан буруннгу жылдан эсе   былтыр 13,5 процентге аз чыгъарылгъанды. Ол санда  аш-азыкъ продукция жарашдыргъан бёлюмде хайырланнган тюрлюлери 11,2 процентге азайгъандыла. Энчи оборудованиягъа да сурам  27,5 процентге тюшгенди.   Гидравлика  эм пневматика  оборудованиягъа уа излем  1,8  кереге ёсгенди.  Машиналадан бла оборудованиядан 19 миллион сом багъасы    сатылгъанды, ол   да буруннгу жылдан  31,6 процентге кёпдю. Бусагъатда ишчилени кёбюсюне  айлыкъгъа 7130 сом тёленеди.