Магъаналы проектлени толтурууну качестволарына энчи эс бургъанды

Къабарты-Малкъар Республиканы Башчысы Казбек Коков «Чегем-парк» проектни бардырылыууна къарагъанды. Ол гитче шахарлада эм тарыхлы жерледе ырахат шахар болумла къураугъа аталгъан Битеуроссей эришиуде эм ахшыгъа саналгъанды. Аны жашаугъа кийирирча жер-жерли муниципалитет 60 миллион сомдан артыкъ алгъанды.

Казбек Коков проекни баш объектлерине къарагъанды. Чегем районну администрациясыны таматасы Юра Борсов ангылатханыча, спорт бёлюмде жыгъылгъанда ачымазча баш къат жайылгъан волейбол эм теннис майданла къураллыкъдыла. Мында узунлугъу беш бла жарым километр болгъан велосипед жолчукъ да башланырыкъды.

Сабий зонагъа оюн майданла эм айнытыу комплексле киредиле. Маданият тийреде шахарчыла байрам кюнлеге жыйылып, асламлы жыйылыула бардыраллыкъдыла. Мында жайгъы эстрада, кёрмюч стендле эм районну эки айтхылыкъ инсанлары – Алим Кешоковха бла Къулийланы Къайсыннга – эсгертмеле салынырыкъдыла.  Фонтан, гитче архитектура затла рекреация бёлюмде жарашдырыллыкъдыла, анда жаяу жюрюрге, солургъа боллукъду.

Солуу тийрелени, спорт эм сабий оюн майданланы, велосипед жолланы, фонтанны эм жайгъы эстраданы жашиллендириу эм тапландырыу ишле башланнгандыла. КъМР-ни Башчысы бардырылгъан ишлени качестволарын эм аланы толтуруу заман болжалны къаты контрольда тутаргъа кереклисине энчи эс бургъанды.

Республиканы оноучусу федерал даражалы эришиулеге муниципалитетлени къошулуу сынамны дурус кёргенди: былтыр эм иги проектге Бахсан шахар округда суу жагъа орманы проекти саналгъанды. Башчы, быллай эришиулеге муниципалитетлени жетишимли къатышыулары районда жашагъанланы игиликлерине деп администрацияны къауумда тири ишлеуюню юлгюсю болгъанын белгилеп, ол башламчылыкъны айнытыргъа тийишлисин чертгенди.