Уллу Хорламгъа жоралап – ярмарка бла кёрмюч

1-10 майда  Нальчикде Уллу Хорламны кюнюне жоралап  къол устала ишлеген аберилени ярмаркасы эм кёрмючю ётерикди. Ол шахарны эрттегили районунда Къабарты орамны баш жанында  къураллыкъды.  Шахарны айнытыу жаны бла  «Арт-зал „Платформа“» деген институтну таматасы Оксана Шухостанова айтханнга кёре, анга республиканы эм башха регионланы да белгили  усталары къатышырыкъдыла. 

Май байрамланы кезиуюнде къол бла ишленнген абери сатып алыргъа, ундан этилген  ашарыкъланы, чайны  бла кофени тюрлю-тюрлю сортларын кёрюрге да онг боллукъду. Сабийлеге уа чыгъармачылыкъ жаны бла мастер-классла бардырыллыкъдыла.    

Андан сора да, мында шахарны тарыхына эм маданиятына жораланып «Ол къалай болгъанды» деген чакъырым бла кёрмюч ишлерикди. Аны экспозицияларыны арасында Уллу Ата журт урушдан сора алыннган, бусагъатха дери артыкъ ачыкъ этилмеген  суратла, картинала эм башха сейир затла да кёргюзтюллюкдюле.  

 

Магометланы Сулейман.
Поделиться: