ЭЛ МЮЛК

Сабанлада иш къазауатды

Быйыл Бахсан районда урлукъну битеу да 32,7 мин гектарда себерге дейдиле. Ал тергеулеге кёре, аграрийле 2,6 миллиондан артыкъ центнер мирзеу жыяргъа умутлудула. Райондан билдиргенлерича, жерни асламысында (24 минг гектарда) мирзеулюк нартюх ёсдюрюллюкдю. Андан сора да, аз-маз арпа, чёплеу эмда будай урлукъ себерге умутлудула. Тахта кёгетлени бла жашил къудоруну уа 1300 гектаргъа саллыкъдыла.

Урлукъ бла жалчытыуда чурум жокъду, минерал семиртгичледен да кереклисича барды. Техника жаны бла да сёз айтырча тюйюлдю: сабанлагъа 412 трактор чыкъгъанды. Урлукъ себиу бла бирге кюзлюклеге семиртгичле салыу иш барады. Аграрийле аны 1,8 минг гектарда (60 %) тамам этгендиле.

Терек бахчаланы юсюнден айтханда, районда ала 4510 гектар жерни аладыла. Ол санда 1889 гектарында терк айныгъан терек бахчаладыла. Аны юсюне Кременчуг-Константиновское эм Баксанёнок элледе аладан энтта да жюз гектар къошарыкъдыла.

Кюзлюклени къайгъысын эте

Прохладна районда сабанлада кюзлюклени заранлы къурт-къумурсхаладан эмда битимлени аурууларындан къоруулау барады. Бу ишде Псевдобактерин-2 эм Гумат+7 «Саулукълу тирлик» деген препаратла хайырланыладыла. Аланы Россельхозараны Къабарты-Малкъарда бёлюмюню лабораториясында жарашдыргъандыла.

Бу учрежденияда айтханларына кёре, битимлени къоруулауда биология эм химия амалланы бирге хайырланыу бютюнда къыйматлыды. Биопрепаратла, заранлы затланы къурутхандан сора да, битимлени ёсюмлерине себеплик этедиле. Ала дагъыда осал хауа болумлагъа чыдамлы боладыла. Эл мюлк предприятияла быллай препаратланы хайыры иги болгъанын белгилейдиле.

Черек район да тири къармашыудады

Черек районну аграрийлери сабан ишлени къыстау бардырадыла. Быйыл районда кюзлюкле 1760 гектарда ёсдюрюледиле. Аланы санында будай, рапс эм арпа бардыла. Быллай сабанланы хар гектарына семиртгичледен 100-120 килограмм жайып бошагъандыла. Бу кюнледе уа вертолёт бла учуп, сабанлагъа химия препаратла жайгъандыла.

Жазлыкъ битимлени урлукъларын а 3640 гектаргъа себерге умут барды. Бу ишни онунчу майгъа бошаргъа дейдиле. Дагъыда картоф, чёплеу, мал ашха жараулу битимле да ёсдюрюллюкдюле.

Районну аграрийлери жерлени бир кесегин ёзен тийреледе ортакъгъа аладыла: Терк эмда Прохладна районлада 3100 гектарны тутадыла. Эм уллу мюлкле уа быладыла: «Сукан–су» кооператив, ООО «им.Аттоева», «Агро- Дружба».

Улбашланы Мурат хазырлагъанды.
Поделиться: