Насыбын излеген жашчыкъ

 (Ингилизли жомакъ)

Эртте-эртте бир жашчыкъ жашап болгъанды. Атына Джек дегендиле. Бир эрттенликде ол, насыбын излей,  жолгъа атланады. Артыкъ узакъ кетмеген эди юйюнден, бир киштикге тюбеп къалады.

-Джек, къайры тебирегенсе?,-деп соргъанды киштик.

-Насыбымы излей барама.

-Мен да барайыммы сени бла?

-Угъай демейме, кел. Экеу болсакъ, жолубуз жарыр,-дегенди Джек.

Сора тебирегендиле бирге экиси да, хапар айта, ойнай-кюле.

Узакъ да кетгинчи итге тюбеп къаладыла.

-Джек,къайры тебирегенсе?-деп соргъанды ит.

-Насыбымы излей барама.

-Мен да барайыммы сени бла?

-Угъай демейме,кел. Ючеу болсакъ, жолубуз бютюн жарыр,-дегенди Джек.

Сора тебирегендиле бирге ючюсю да, хапар айта, ойнай-кюле.

Алайда артыкъ узакъгъа кетмей,эчкиге тюбеп къалдыла.

-Джек,къайры тебирегенсе?-деп сорду эчки.

-Насыбымы излей барама.

-Мен да барайыммы сени бла?

-Угъай демейме,кел. Тёртеу болсакъ, жолубуз андан да бек жарыры,-дегенди Джек.

Сора тебиредиле тёртюсю да, хапар айта, ойнай-кюле.

Кёпмю-азмы бардыла ала, ёгюзте тюбеп къалдыла.

-Джек,къайры тебирегенсе?-деп сорду ёгюз.

-Насыбымы излей барама.

-Мен да барайыммы сени бла?

-Угъай демейме, кел. Бешеулен болсакъ, жолубуз къысхарыр,-дегенди Джек.

Сора тебирегендиле бирге бешиси да, хапар айта,ойнай-кюле.

Алайдан узакъ кетгинчи,  адакъагъа тюбеп къаладыла.               

-Джек,къайры тебирегенсе?-деп сорду адакъа.

-Насыбымы излей барама.

-Мен да барайыммы сени бла?

-Угъай демейме, кел. Алтаулан болсакъ, жолубуз къысхарыр,-дегенди Джек.

Сора тебирегендиле бирге алтысы да, хапар айта,ойнай-кюле.

Иги кесек жол къыдыргъандан сора къарангы болуп тебирегенди. Къалыр жер излер къайгъыгъа киргендиле была. Ол кезиуде жол жанында бир юйню кёргендиле.

Нёгерлерине шум болугъуз деген белги берип, Джек барып, юйню терезесинден жашырын къарагъанды. Анда уа тонаучу къауум олтуруп, урлагъан ахчаларын санай тура эдиле.

Джек къайтып келгенди да, мен белги бергенимлей, барыгъыз да бирден  къычыралгъаныгъыз чакълы бир къычырыгъыз, дегенди. Барысы да къычырыргъа хазыр болгъандыла.  Джек белги белгенлей, киштик мяуну басханды, ит юргенди, эчки макъыргъанды, ёгюз мёнгюрдегенди, адакъа къычыргъанды. Аллай къатыш дауурну эшитгенлей, тонаучула къоркъуп, къачып кетгендиле. Ала кетгенлей, Джек нёгерлери бла юйге киргенди.

Алай  тонаучула къайтып келирге болурла деп къоркъа эди. Ол себепден энди тынчайыр заман болады дегенде, киштикни шинтикге жатдырады, итге стол тюбюн кёргюзтеди, эчкини чардакъгъа ёрлетеди, ёгюзню подвалда букъдурады, адакъаны юй башына миндиреди.

Тонаучула юйде чыракъ жарыкъ ёчюлгенин кёргенлей, кеслеринден биреуню ахчаны алып кел деп жибередиле. Алай ол терк окъуна куухотун этип къайтады, анда асыры къоркъгъандан ёлюрге аздан къалгъаныны юсюнден хапар айтады.

-Юйге киргенимлей, шинтикге олтурайым десем, анда уа бир къарт къатынчыкъ олтуруп, эшиу эте тура эди да, эшиу этген ийнесин чанчып жибермеймиди ма былайыма!

Ол а, сиз билгенден, киштик эди.

-Сора ахчаны алайым деп, столгъа жанлагъанымлай, аны тюбюнде уа бир чурукъчу олтуруп тура кёреем, чурукъ тигиучю ийнесин чанчып къоймаймыды ма былайыма!

Ол а ,сиз билгенликден, ит эди.

-Чардакъгъа ёрлейме, анда уа биреу ындырда сынжыр бла мирзеу ууа тура эди да, сынжыр бла жетдирип жибереди да, чардакъдан кетерге аздан къалама!

Ол а, сиз билгенден, эчки эди.

-Ахырында,подвалгъа тюшеме, анда уа отун жара тургъан бир мазаллы зат  балтаны жиперип жибермеймиди! Башымы къолтугъума алып, кючден къутулгъанма алайдан.

Ол а, сиз билгенден, ёгюз эди.

-Юй башында олтургъан жапысыз а аланы барындан да кюйсюз эди. «Тутугъуз да, келтиригиз аны манга!»-деп къычырыргъа къалгъанында, тёзалмай, къачып кетгенме.

Ол а, сиз билгенден, адакъа эди.

 

Текуланы Жамал кёчюргенди.
Поделиться: