Къаллайланы сайлайдыла шёндюгю къызла?

Кёп болмай Россейни  41 регионунда 35 минг тиширыуну къатышыулары бла, Pravda.ru агентство Интернет соруу бардыргъанды. Анда шёндюгю къызла жашау нёгерге къаллай эр кишилени сайлагъанларын ачыкълагъандыла.

Алай бла, бюгюнлюкде излемлеге келишген эр кишини айлыгъы 70-150 минг сомгъа дери болургъа керекди. Бу тарихле регионлагъа кёредиле. Таксиде, доставкада ишлеген жашлагъа сурам уллу тюйюлдю, дерге боллукъду.

Тиширыуланы асламы Москвада бла Санкт-Петербургда жашагъан, ёсюмлери 175 сантиметр болгъан предпринимательлени, медиклени эм депутатланы излейдиле. Андан сора да, эр киши юйде бузулгъан затны ишлей билирге, тиширыуну намысы ючюн сюеле билирге, алкогольдан кери болургъа керекди. Жашны тынгылы машинасы бар эсе уа, бютюнда аламат. Аллайны бир тиширыу да ычхындырмазлыгъы  хакъды.

Сорууну бардыргъанла чертгеннге кёре, шёндюгюлю къызла жашау нёгер излегенде,  аны сыфатын да унутуп къоймайдыла. Ол спорт бла кюрешиуге да эс бёлюрге да борчлуду.

Битеу айтылгъан затланы эсге ала, жашауну излемлери тюрленнгенлерине тюшюнесе.