Ауузну заманындан алгъа ачханны азабы

Мухаммад файгъамбарны, Аллахны саламы анга болсун, сахабасы Абу Умам аль-Бахили былай билдиргенди: «Мухаммад (АСБ) былай айтханын эшитгенме: «Бир жол тюшюмде экеулен келип, инбашларымдан тутуп, адам чыгъалмазлыкъ тик къаяны къатына келтирип, ёрле, дегендиле. Мен ары чыгъаллыкъ тюйюлме, деп жууаплайма. Ала уа, биз санга женгиллетирбиз, дейдиле. Алай бла ёрлеп башлайма. Тёппеге жетгенимде, ачы тауушла эшитеме. «Кимледиле ол къычыргъанла?»,-деп сорама. «Ала отда кюйгенледиле»,-деп жууаплагъандыла эмда мени ары ашыргъандыла. Анда сингирлеринден тагъылгъан адамланы кёреме, аланы жаякълары жыртылып, къан тёгюле. «Кимледиле бу адамла»,-деп соргъанымда, Оразаны болжалдан алгъа ачханладыла,-дегендиле» (ан-Насаи).

Оразаны заманын сакъламай, ауузну алгъа ачханла быллай къыйынлыкъла сынарыкъ эселе, аны бир тюрлю сылтаусуз ахырда тутмагъанла къаллай азап кёрлюклерин акъылгъа келтирген да къыйынды.

Рамазан айда кюндюз ауузланнган Аллахуталаны буйрукъларындан, Мухаммадны (АСБ) айтханындан чыгъады эмда уллу гюняхха киреди. Адам оразагъа сый бермей, ол борч тюйюлдю деп  кесин кюнню узунуна ашдан-суудан тыймай эсе,  ол кяфырды, деген оюмгъа келгендиле ислам алимле. Сыйлы Къуранда, файгъамбарны сюннетинде Рамазанда ораза муслийманлагъа борч болгъаны шарт жазылыпды.

Алай аны борчлулугъуна ишекли болмай, эринип, кёл салмай тутмагъан а терс иннетлиди. Ол  тобагъа къайтып, мындан ары аллай кемчилик къайтармазгъа керекди, дейдиле алимле.

Ибн Мас”уд былай айтханды: «Рамадан айда оразасын сылтау болмай бир кюн окъуна бузгъан, артда жашаууну ахырына дери аны тутса,  толусунлай къайтараллыкъ тюйюлдю.  Аны кечерге неда жууапха тартыргъа  деген оноуну   жангыз Аллах чыгъарлыкъды».

 

«Ислам в Евразии» газетден Тикаланы Фатима хазырлагъанды.
Поделиться: