Роспотребнадзорну Къабарты-Малкъар Республикада Управлениясы  билдиргеннге кёре, адамны саулугъуна заран тюшюрген болмаса, бир тюрлю хайыр бермеген затладан бири тютюн болгъаныны юсюнден айтылыр, жазылыр ючюн да къалмайды. Аны кертилигин ёз чархларында сынагъанла кёпдюле. Алай эсе да, жарсыугъа, тютюнсюз болалмагъанла да аз тюйюлдюле. Бизни бу эсгертиуюбюзню баш мураты аллай адамлагъа тюз сайлау этерге болушууду.

Тютюннге (сигарет эсе да) багъа аны мылылыгъына, чайыры, никотини, букъусу къаллай бир болгъанына, тюрсюнюне, татыууна, ийисине кёре бичиледи. Андан сора да, сигаретлени, папиросланы узунлукъларына, фильтрлерини, жыртылмай-бузулмай болгъанларына, къалай тышланнганларына эс бурулады. Ол затланы хар бири ючюн балл (игилигин билдирген тарих) тохташдырылады да, аланы бирге къошханда, 150-ден озмазгъа керекди. Тютюнню ийиси, татыуу уа аз эсленнгенине, тилни кюйдюргенине, тамакъны аз ачытханына кёре бериледи балл (багъа).

Физика-химия кёрюмдюле уа былайдыла: сигаретни фильтрсиз узунлугъу - 70,8; 85 эм 100 миллиметр, папирослада уа ол ёлчем 70-120 миллиметр чакълы болургъа керекдиле. Стандартлагъа кёре, тютюнню мылылыгъы (сигаретледе, папирослада да) 11-15 процент болургъа тийишлиди. Тютюн букъуну битеулю ёлчеми сигаретледе -аланы классларына кёре, папирослада уа 3,5 процентден озмазгъа керекдиле.

Тютюн затланы тышланнганлары  эм къалай жасалгъанлары (маркировкалары)  Р51087-97 ГОСТ-ха  «Табачные изделия. Информация для потребителя» деген излемге тийишлиликде этиледиле.

«Тютюн ичиуге чек салыуну юсюнден» федерал  законнга кёре сигаретлени, папиросланы маркировкаларында быллай затла болургъа керекдиле: тютюнню аты, маркасы, товар белгиси, товарны жарашдыргъанны эм лицензия бергенни атлары, пачкада ненчасы болгъаны,  ментол  неда башха къошагъыны юсюнден жазыуу, норматив эм техника документи, сертификацияны юсюнден билдириую.

Тютюн, бир къыралда ёсдюрюлюп, жарашдырылгъан а башхасында этиле эсе, маркировкада артдагъы къыралны аты кёргюзтюледи. Тютюн хата берлигини юсюнден пачканы тышында «Минздрав предупреждает: курение опасно для вашего здоровья» эм башха тюрлю эсгертиую болургъа, сигаретни (папиросну) тютюнюнде чайыры эм никотини къаллай бир болгъаны да жазылыргъа тийишлиди.

Тютюн изделияланы сатыуда быллай чекле салынадыла: пачкада сигаретлени саны мардадан аз болмазгъа керекди, аланы бирем-бирем этип сатаргъа эркинлик берилмейди. Медицина, физкультура-спорт, билим бериу эм культура учрежденияланы къатларында тюкенледе эм 18-жыллары толмагъанлагъа сатаргъа да эркинлик берилмейди.