Бюгюн - школчула, тамбыла - айырыучула

Черек районда Жаш айырыучуну кюню  бардырылады. Жер-жерли айырыу комиссия  район администрация, билим бериу эмда жаш тёлю политика  управление бла бирге  Къашхатауда, Зарагижде, Бабугентде, Огъары Малкъарда битеулю билим берген учрежденияланы окъуучулары бла тюбешиуле бардырады. Бу ишни  мураты – жаш адамланы эслерин айырыулагъа эмда саулай да айырыу правогъа бурууду, ала  къырал властьны органларын бла жер-жерли самоуправленияны органларын къурау бла байламлы бу ишге тири къатышырча этиудю.

Черек районну айырыу комиссиясыны председатели Къулбайланы Алан школчулагъа Россей Федерацияда айырыула бардырыуну жорукъларыны юсюнден тынгылы  айтханды. Ол кюн окъуна Къашхатауну орта школунда  айырыу правону юсюнден  ангылаулары болгъан къауумланы араларында  брейнг-ринг да бардырылгъанды.

Быллай  ишле районну битеу школларында  да къураллыкъдыла. Бу жумушну башламчыларыны  оюмларына кёре, жаш айырыучула бла бардырылгъан быллай тюбешиуле  алагъа бек сейир эмда магъаналы кёрюнедиле. Аны хайырындан ала  айырыуланы юсюнден кёп биледиле, аланы хар инсаннга да не магъана тутханларына тюшюнедиле, кеслерини  оюмларын айтыргъа да юйренедиле. Алай бла Жаш айырыучуну кюнюн къурауну мураты да толады -  жаш  адамланы инсанлыкъ жууаплылыкъларын кётюрюу  эмда  право билимлерин ёсдюрюу.

Бардырылгъан ишни эсеплерине кёре, хар школдан эм тириле айырыллыкъдыла, артда ала бла районну башчылары эмда  Россейни МВД-сыны Черек районда бёлюмюнде  къуллукъ этгенле бла  тюбеширикдиле.