Жаш водительлени машинаны къоркъуусуз жюрютюуню жорукъларына юйретирикдиле

Республиканы жолларында «Машинаны жюрютюп башлагъан водитель» рейд къураллыкъды. Ол сынаулары болмагъан, руль артына энди олтургъан инсанланы къатышыулары бла аварияланы азайтыр мурат бла бардырыллыкъды.

Тарихлеге кёре, машинаны энди жюрютюп башлагъанла кеслерине асыры базынып, авариялагъа терк-терк тюшедиле. Асламында ала машиналаны араларында кенгликни сакъламайдыла, теркликни терс сайлайдыла, аллына келген машиналаны жолларына чыгъадыла.

Сёзге, быйылны аллындан бери озгъан кезиуде машинаны жюрютген стажлары эки жылгъа жетмегенлени хатасындан 9 авария болгъанды. Алада бир адам ёлгенди, 11-си уа жарала алгъандыла.

Быллай болумланы азайтыр мурат бла къырал автоинспекторла 5-15 апрельде «Машинаны жюрютюп башлагъан водитель» рейдни бардырлыкъдыла. Аны кезиуюнде сынаулары аз болгъан водительлени авариясыз жюрюуню мадарларына юйретирикдиле. Жолда жууаплы болургъа, башхалагъа хурмет этерге кереклисин ангылатырыкъдыла.

Жолда жюрюуню къоркъуусузлугъуну инспекторлары водительлени барысын да жорукъланы сакъларгъа, бир бирге жол берирге, хурмет этерге чакъырадыла. Кесигизни эм башхаланы саулукъларына къоркъуу салмагъыз!