Жалгъан шартланы хазырлагъанды

Былтыр октябрьде КъМР-де МВД-ны кеси къоркъуусузлукъ бёлюмюне 35-жыллыкъ чегемчи тарыкъгъанды. Ол билдиргенича, РФ-ни Чегем районда ОМВД-сыны оперуполномоченныйи ол районда юч уручулукъну этгенине женгдирсе, анга ахча тёлерге сёз бергенди.
 Тинтиуледен ачыкъланнганыча, полицияны майору чегемчини ыразылыгъын алып, аны аты бла тийишли документле къурагъанды. Жалгъан  шартланы полициячы   следствие бёлюмге бергенди, ала уа аланы уголовный ишге къошхандыла. Ызы бла   полициячы эр кишиге  саугъагъа 13 минг  сом бергенди.  Алай ол уголовный жууапха тартыллыгъын  ангылагъанлай, право низамны сакълаучулагъа  тарыкъгъанды.
РФ-ни Следствие комитетини КъМР-де следствие управлениясыны къуллукъчулары оперуполномоченныйге РФ-ни УК-сыны 286-чы статьясыны 1-чи кесегине кёре эмда 303-чю статьясыны 2-чи эмда 3-чю кесеклерине  кёре уголовный иш ахчандыла. Ол кесини къуллугъун артыгъы бла хайырланнганы эмда уголовный ишде жалгъан шартланы  хазырлагъаны ючюн терсленеди.
КъМР-де МВД бардыргъан тинтиуледен сора полицияны майору ич ишле органланы къуллукъчусуну бетин жойгъан ишни этгени ючюн къуллугъундан эркин этилгенди. Аны таматалары дисциплани жууапха тартылгъандыла.

Тикаланы Фатима хазырлагъанды.
Поделиться: