Асфальт чыгъаргъан заводла ишлеп башларгъа хазырдыла

КъМР-ни Транспорт эм жол мюлк министерствосундан билдиргенлерича, бюгюнлюкде республикада  ондан аслам асфальт  чыгхаргъан  завод барды. Аланы кючлери  тийишли сырьё бла  муниципал районланы  толусунлай жалчытыргъа жетерикди.

Быйыл «Къоркъуусуз эм качестволу автомобиль жолла» миллет проектни чеклеринде республикада 21 жолгъа  тынгылы ремонт этилликди. Аланы узунлугъу жюз километрден асламды. Жангыртыу ишлени кезиуюнде асфальтны эки  неда  юч къат жаяргъа тюшеди.  Ол себепден,  планнга кёре,  эм азындан 160 минг тонна материал къоратыллыкъды.
Бир-бир объектледе ишле  кюн жылыннганлай башланырыкъдыла. Ол себепден бюгюн окъуна асфальт этген заводла бир тюрлю сылтаусуз  борчларын  толтурургъа хазыр болурлары изленеди.   Аны бла байламлы республиканы Транспорт эи жол мюлк министерствосуну эм Жол мюлк управлениясыны келечилери предприятияланы болумлары бла шагъырейленирча  тинтиу  бардыргъандыла.

Ала ачыкълагъанларыча, заводла  бюгюн окъуна ишлеп башларгъа хазырдыла. Алада бир тюрлю уллу   кемчилик табылмагъанды -  объектлени техника эм производство онглары да бар мардалагъа келишеди. 

 

Курданланы Сулейман.
Поделиться: