Ёсюп келген тёлюню тюз юйретиуге талпыныу бла

Жыл сайын Россейде хунерли педагогланы баямлаугъа, аланы социал даражаларын кётюрюуге эмда къыйнларын ачыкълаугъа жораланнган конкурс  бардырылыучуду. Бу кюнледе аны муниципал уруму  озгъанды. Аллай эришиу Элбрус районда да къуралгъанын бизге аны пресс-службасындан билдиргендиле. Жыйылыугъа сагъынылгъан районну администрациясыны башчысы Залийханланы Къаншаубий, аны биринчи орунбасары Арслан Улимбашев, билим бериу управленияны таматасы Атаккуланы Нюржан, бешинчи номерли гимназияны (Тырныаууз шахар) директору Моллаланы Фатима,  эл администрацияны келечилери да къатышхандыла.

Конкурсда кеслерини сынамларын, билимлерин а беш педагог кёргюзтгендиле – Бедик элни орта школуну башланнган классларыны устазы Хаджиланы Марина Борисовна, Огъары Бахсанны Теммоланы Мусса атлы мектебинде физикадан дерсле берген педагог Жазаланы Карина Хусейновна, Тырныауузну Василий Кузнецов атлы алтынчы номерли орта школунда ингилиз тилден окъутхан Макытланы Фатима Борисовна, Нейтрино посёлканы битеулю билим берген мектебини башланнган  классларыны устазы Балаланы Вероника Руслановна, Кёнделенни Энейланы Тимур атлы тёртюнчю номерли мектебини ингилиз тилден дерсле берген педагогу Татьяна Андреевна Кушхова. Аланы барысында да  бир ышанны – сайлагъан усталыкъларына кертичиликни, кеслерини  окъуучуларына качестволу билим  бериуге итиниулюкню эмда ёсюп келген тёлюню ачыкъ ниетлиликде  ёсдюрюрге эс бурууну чертирге боллукъду.

Чыгъармачылыкъ эришиуге  къатышханланы, ала бла бирге жыйылгъанланы барысын да жюрини эмда энчи кесини  атындан Залийхан улу  алгъышлагъанды. Ол  сагъынылгъан конкурс  профессионал даражагъа жетиуде,  усталыкъ жаны бла айныуда атлам болгъаны бла бирге  окъутууда  ишлегенлеге жангы амалланы ачханын, жетишимлеге жол болгъанын белгилегенди. Устазланы барысына да жетишим тилей, эришиу ачыкъ халда болурун сюйгенин айта, анда алчылыкъгъа тийишли болгъан конкурсну республикалы урумунда районну атын айтдырлыгъына ышаннганын да билдиргенди.

Нуржан Манафовна уа, эришиуде къуралгъан сынаула жаланда педагогну профессионал даражасын ачыкълап къоймай, анга къатышыргъа базыннганла билим бериуню  игилендирирге, анга хайыр келтирлик, къыйматлы да боллукъ жангычылыкъланы кийирирге излегенлерин ангылау болгъанын чертгенди. Бир ишни бардыргъанла бирге жыйылып,  сынамларын  кёргюзтюу, ачыкълау – ол бёлюмню,  башхача айтханда уа, жаш тёлюню окъутууну айнытыуну ышаны болгъанын белгилеп, устазланы барысына да жетишим тежегенди.