Дарманны не бла ичерге керекди

Врач жазгъан дарманланы ичип тургъанма, болсада ала манга хазна болушмагъандыла. Доктор а манга, кесинг терссе – аланы ызларындан жарамагъан сууну  ичгенсе, дегенди. Дарманны ызындан чайны неда сууну ичиуню башхалыгъы алай уллумуду?

Алтууланы М., Нальчик  шахар.

Врач-фармацевт Николай Сурков бизге айтханнга кёре, дарманланы къайнатылып сууугъан суу бла ичерге керекди. Аланы ызларындан чай, кофе, сок, сют, газы болгъан суусапла, ала таблеткала бла къалай келишириклерин билмей эсегиз, ичерге арталлыда жарамайды! Бу излемни толтурмасагъыз, бек азындан дарманыгъызны бир тюрлю хайыры болмай къаллыкъды, бир-бирледе, андан къадарыгъыз сакълансын ансы, саулугъугъуз бютюнда тууарылып къалыргъа боллукъду.

Болсада суу бла угъай, башха тюрлю суусун затла бла ичилирге тийишли дарманла да аз тюйюлдюле. Сёз ючюн, аспиринни, эритромицинни ызларындан гара сууланы (Боржоми, Ессентуки № 4, Ессентуки № 17) ичсегиз игиди. Индометацин, резерпинни эм йодлары болгъан дарманланы уа сют бла бирге ичерге керекди. Былайда сютню орунуна апельсинни согун да хайырланыргъа боллукъду: дарманланы ол бютюнда терк эритеди. Антибиотиклени уа жаланда суу бла, аны да 1 стакандан аз болмагъаны бла ичерге керекди.

Таблетканы ызларындан чай эм кофе ичерге жарамайды. Дарманланы ызларындан газлары болгъан бояулу татлы сууланы да, хаталары болмаса, хайырлары жокъду. Кёгетледен этилген суусапланы – бютюнда мыстыларын – къатышдырмазгъа кюрешигиз дарманла бла: ала аш орунда кислотностьну азайтыучу дарманланы хайырларын арталлыда жокъ этип къоядыла. Бу тюрлю дарманладан сора грейпфрут сокну уа ичерге арталлыда жарамайды! Алимле тохташдыргъанларына кёре, бу суусапны  къошулмалары  аш орунда ферментледен бирлерин ахыры бла да къурутуп къоядыла.

Этезланы Зульфия хазырлагъанды.
Поделиться: