Жашау журтлагъа танг къошулады

Быйыл Къабарты-Малкъарда «Къурулуш» программагъа кёре  1,6 миллиард сом  багъасына жашау журт ишленнгенди. Ол былтыр бу заман бла тенглешдиргенде, юч кереден   кёпдю, деп билдириледи Кавказстатдан. 

Жыл башланнганлы республиканы   къурулуш бардыргъан  предприятиялары бла  организациялары  эм энчи предпринимательлери  21,7 минг квадрат метрде  278 чакълы жангы фатар салгъандыла. Ол а озгъан жылны  бу кезиуге эсеплеринден  3,6 минг квадрат метрге асламды. 

Эл жерледе да къурулуш къыстау барады,  быйыл эки айгъа 7 минг квадрат метрде 60 фатар ишленнгенди. Андан сора да,  мартны ахырына 8,2 минг квадрат метрде 165 фатар.   Энчи иелиле да  13,5 минг квадрат метрде 113 юй салгъандыла.   Саулай алып айтханда, бюгюнлюкде республикада  500 минг квадрат метрде   жашау журт ишленнгенди.