Он жылны ичинде битеукъырал магъаналы курорт болгъанды

Минги тау жангызда  тамашалыкъ табийгъаты, къарлы тиклери бла белгили тюйюлдю, ахыр он жылда битеуроссей магъаналы курорт болгъанды, тыш къыралладан къонакъла да анда солуу кюнлерин ётдюрюрге излейдиле. Мында тау лыжа спорт да иги айныгъанды, тюрлю-тюрлю даражалы эришиуле дайым бардырыладыла. Аланы къурау, спортчуланы юйрениу - жарау этиу жыйылыуларын ётдюрюу бла уа Къабарты-Малкъарны тау лыжа спортдан бла сноуборддан федерациясы кюрешеди.   

Арт кезиуде республикабыздан спортчула Башкортостанны Белорецк шахарында тау лыжа спортдан битеуроссей эришиулеге, Челябинск областьда къыралны кубогуна, Москва эм Калуга областьда «Россейни гитче шахарларыны кубогу» деген турнирде, Сочиде регионла аралы эришиулеге къатышхандыла. Алагъа лыжачыларыбыз Спорт министерствону, Тау лыжа спортдан бла сноуборддан федерацияны, спонсорланы бла ата-аналарыны болушлукълары бла баргъандыла.

Спортну къыш тюрлюлерини кюнюне бла Ата журтну къоруулаучуну кюнюне аталгъан эришиуле да Минги тауда кёп спортчуланы жыйгъандыла. Анда бизни лыжачыларабыз да ахшы кёрюмдюле болдургъандыла. Жер-жерли тау лыжа школдан Мурзаланы Артур спортну устасына кандидатны нормативин толтургъанды, Егор бла Анастасия Потёмкинлеге биринчи разрядла берилгендиле.

Элбрусну тау лыжа комплекси Россейни Спорт министерствосуну къыралны жыйымдыкъ командаларыны тау лыжа спортдан, фристайлдан бла сноуборддан юйрениу - жарау этиу жыйылыула бардырылыучу объектлерини тизмесине киреди. Алай бла Азауда Москваны эм Москва областьны, Мурманск областьны, Татарстан Республиканы, Пермь крайны, Камчатканы эм башха регионланы командалары усталыкъларын ёсдюрюп кетгендиле. Минги тауда жайда бардырылгъан эришиуле уа тёрели халда къураладыла эм официальный календарьгъа киредиле.  

Къарны жаугъанына кёре, тау лыжа школну спортчулары да анда жарауларын бардырадыла. «Курорт Эльбрус» акционер общество жаш спортчуланы канат жоллары бла тауны башына хакъсыз кётюреди. Алай, тау лыжа спортда да жетишимли болур ючюн, энчи тренажёрла бла жалчытылыннган спорт комплекследе жарау этерге керекди. Бу проблеманы бир кесеги республиканы Спорт министерствосу Элбрус элде ишлеген ачыкъ спорт майданны хайырындан кетерилгенди, жарсыугъа, ол  2017 жылны сентябринде ырхы келгенде чачылгъан эди.

Анатолий ТЕМИРОВ.
Поделиться: