Окъуууна да сакъ, жарауларына да къаты

Гитче спортчула, сынамлары аз болса да, хорламгъа итиниулюклери, тириликлери бла абаданладан артха къалмайдыла. Ала, кюнден-кюннге усталыкъларын ёсдюре, атларын айтдырадыла. Аллайладан бири  Жаппуланы Къууанчды, ол дзюдогъа сабий саддан сора жюрюп башлагъанды, тренер Шауаланы Ханапийни къолунда юйренеди.

Спорт бла Къууанч бла беш жылны кюрешеди. Секциягъа аны атасы Элдар келтирген эди. Жаш дзюдочу къатышхан эришиулеринде жетишимли болмай хазна къалмайды. Алгъаракълада ол Нальчикни биринчилигинде беш сермеш бардыргъанды эм барысында да хорлагъанды.

Былтыр, Уллу Хорламны кюнюне аталып, Нальчикде дзюдодан эришиу болгъанды. Анга 2008-2009 жыллада туугъан 200-ден аслам спортчу къатышхандыла. Анда Къууанч 32 килограмм ауурлукъ къауумда доммакъ майдалны алгъанды. Биринчи сермешинде къытханды, алай экинчисинде даулашлы болумлада хорлатып, «алтын» ючюн эришалмагъанды. Аны ызындан болгъан тёрт тюбешиуюнде хорлап, ючюнчю жерге чыкъгъанды.

Республиканы Терек шахарында дзюдодан, ажымлы ёлген белгили гёжеф Вадим Шомаховну хуметине аталып, тёрели эришиуде Къууанч 35 килограмм ауурлукъда тутушханды, бу къауумда къаршчы спортчуланы саны кёп болгъанын да белгилерчады. Аны ючюн Жаппу улу беш сермеш бардыргъанды, аланы барысын да женгил, болжалгъа дери хорламла бла бошагъанды. Финалгъа чыгъар ючюн тюбешиуюнде, судьяла даулашлы оноу чыгъарып, хорламны башха спортчугъа бергендиле. Доммакъ майдал ючюн тюбешиуюнде уа Къууанч тюз да майданнга чыкъгъанлай, къаршчы дзюдочуну тёнгеретип, къысха заманны ичинде хорлагъанды.

Къууанчны мураты Олимпиада оюнланы чемпиону болургъады, кёл салып жарау этгенинден тышында, ол мектепде дерслерине да сакъды.

 

Кульчаланы Зульфия.
Поделиться: