Элде жашагъанланы айлыкъларына къошулгъанды

РФ-ни Пенсия фондуну КъМР-де бёлюмюню пресс-службасындан билдиргенлерине кёре, быйыл кийирилген тюрлениулени эсге алып, элде жашагъанланы пенсиялары къаллай бир боллугъу тергелип бошалгъанды. Аны эсеплерине кёре, ишлемеген 2800-ден аслам адамны ахчаларына къошулгъанды.

Пенсияла жангыдан пенсиячыланы бёлюмде болгъан документлерине кёре тергелгенди, къошулгъан ахчаны ёлчеми 1333 сомгъа жетгенди. Бу иш бусагъатда да бардырылады.

Пенсиясына къошуллукъ адам, фондха барып, документлерин берирге боллукъду. Эсгертиу: къошакъ ахча 30 жылны эл мюлкде уруннган, шёндю да элде жашагъан эм бусагъатда ишлемеген инсаннга тёленирикди. Аны урунуу стажына колхозлада, совхозлада неда башха эл мюлк (бахчачылыкъ, чабакъчылыкъ, малчылыкъ бла кюрешген) предприятиялада ишлеген жыллары киредиле.