Аналыкъ капиталдан тёлеулени алыуну алгъыннгы жорукълары къайтарыладыла

Коронавирусну пандемиясы бла байламлы аналыкъ капиталдан ай сайын берилген тёлеулени болжаллары былтырны апрелинден башлап заявлениясыз кёбейтилгендиле. Быйыл мартдан башлап аланы алыр ючюн, алгъадача, заявление жазаргъа керек боллукъду. Аны Пенсия фондну порталында энчи кабинетде эм клиент службаларында, къырал жумушланы сайтында, кёп жумушланы тамамлагъан аралада берирге жарарыкъды.

Сертификатдан бу тёлеу сабийге 3 жыл толгъунчугъа дери алынады, аны ючюн заявленияны уа жыл сайын жазаргъа керекди. Башхача айтханда, экинчи туугъан балагъа жыл, эки жыл толгъанындан сора ата-ана фондха тёлеуге эркинликлери болгъанын билдирирге тийишлидиле. Аны ючюн юйюрню файдасыны ёлчемини юсюнден справка да изленирикди – ол бир айгъа адамгъа жашау этерге керекли ахчаны эм аз ёлчеминден эки кереден кёп болмазгъа керекди. Алай бу справка юйюрлени барысындан да изленмейди, кёп шартланы фонд ЕГИССО-дан (социальный жалчытыуну бирикдирилген информация системасы) алады. Ол ата неда ана аскерчи, къутхарыучу, полициячы неда башха кюч ведомствону ишчиси эсе, юйюрню адамларындан бири билим бериу учреждениядан стипендия, грантла ала эсе изленирикди.

Эсгертиу: ай сайын берилген тёлеулени алыр ючюн заявление бала туугъанындан сора жарым жыл ётгюнчю жазылгъан эсе, ахча битеу айла ючюн бирге берилликди. Жарым жылдан сора жазылгъан эсе уа, заявление къабыл кёрюлген замандан башлап.