Низамлыкъны жалчытыуда жамауат болушлукъ

Къырал автоинспекторла жол-транспорт болумланы профилактикасы жаны бла бардыргъан мадарланы хайырындан ауур аварияланы саны азайгъанын белгилерчады.

Жылны аллындан бери озгъан эки  айны ичинде кеф  водительлени хатасындан бир авария да болмагъанды, аллына келген машинаны жолуна  чыкъгъанлары бла байламлы  ДТП-ла уа  50 процентге къысхаргъандыла. Аны бла  бирге жол-транспорт болумлада жоюлгъанла бла жаралы болгъанла 40 процентге азайгъандыла, деп билдиргендиле бизге УГИБДД-дан.

Жоллада низамлыкъны жалчытыугъа республиканы жамауаты уллу къошумчулукъ этгенин белгилейдиле право низамны сакълаучула. Адамладан келген билдириулени болушлугъу бла жолда жюрюуню жорукъларына жюзден аслам бузукълукъ тохтатылгъанды, 20 кеф водитель тутулгъанды.

 Профилактика мадарла водительлени араларында низамны, жорукъланы сакъламагъанла болгъанларын ачыкълайдыла. Сёзге, Нальчикде мартны ал кюнлеринде къуралгъан рейдни кезиуюнде ГОСТ-ну бузуп, машиналарыны терезелерин асыры къаралдым этген 58 водитель  ачыкъланнганды.

Аны себепли жолда жюрюуню къоркъуусузлугъун жалчытыугъа бурулгъан рейдле мындан ары да бардырыллыкъдыла. Жууукъ кюнледе (19 эм 27 мартда) кеф водительлени ачыкълау жаны бла мадарла толтуруллукъдула.