Аны назмулары бюгюн да эшитилгенлей турадыла

12 февральда совет, россейли поэтесса, кёчюрмечи, республиканы Къырал премиясыны лауреаты Инна Иналовна Кашежева туугъанлы 75 жыл толгъанды.  Аны хурметине  гитче Ата журтунда – Зольский районну Каменномостское элинде – эсгериу ингир къурагъандыла.  Биринчи номерли школну  музейинде мемориал къанганы да ачхандыла.

Байрамгъа Зольский районну администрациясыны башчысы Р. Гятов, КъМР-ни Жазыучуларыны союзуну правленини председатели Беппайланы М., КъМР-ни Жамауат палатасыны келечиси М. Котлярова, Нальчик шахарда хасаны таматасыны къуллугъун болжаллы халда толтургъан М. Мафедзев, элни абаданлары, Кашежевланы келечилери, школчула бла устазла да келгендиле.  

Сёз айтханланы барысы да бир аууздан  Инна Иналовнаны  энчилигин, тазалыгъын, граждан темпераментлилигин белгилегендиле. Бу ышанланы аны  лирикалы сыфаты бла келишгенлери уа бютюн аламат кёрюнеди. Жыйылгъанла Кашежеваны атасы  Инал Шахимовични, аны Каменномостское элден болгъанын да эсгергендиле. Поэтессаны атасын бла анасын бирге уруш къошханды, Инна уа кесине «крестница Победы» деп айтыучу эди.

Назмуланы ол бек эртте жазып башлагъанды. Аланы ара газетледе эм журналлада басмалагъандыла, ол заманда къыз тогъузунчу классда окъугъанды. Аны биринчи жыйымдыгъыны аты «Вольный аулду». Къулийланы Къайсын аны чыгъармаларына бийик багъа бергенди, «шорха сууну салкъынлыгъы» дегенди ол аны тизгинлерине.

Поэтессаны жууукъ-ахлусу ингирни къурагъанлагъа жюрек ыразылыкъларын билдиргендиле.  Кашежеваны къадарында атасыны журту уллу магъана тутханын да белгилегендиле ала. Ол элни терк-терк жокълаучу эди. Кесини айтыууна кёре, ол ары юйренчек болгъаны ючюн угъай, жюреги чакъыргъаны, тартханы ючюн келгенди. 

Малкъарны юсюнден назмулары да, Къабартыны юсюнден жазгъанларыча, жарыкъдыла, ариудула, тазадыла.  Бабугентде аны атын орамладан бирине атагъандыла, Атажукин бахчада  Поэзия аллеяда  мермер китапда «Ушакълашчы мени бла, атам»  деген аламат терен магъаналы назмусу жазылыпды.

Былтыр школ музейде Инна Кашежеваны хурметине аны бюстун салгъандыла.  Аны Р. Гятовха Санкт-Петербургдан келтирип Р. Фиров саугъалагъанды. Бюгюнлюкде уа ол эсгертмени баш жанында мемориал къанганы да кёрюрге боллукъду.  Энди музейде Инна Иналовнаны энчи мюйюшю барды.

Байрам халлы ачылыудан сора  къонакъла элде кёп болмай ремонтдан сора ачылгъан Культура дворецге ётгендиле, анда «Я душу латала пером»  атлы  эсгериу ингир бардырылгъанды. Сахнада Инна Иналовнаны аламат назмуларын К. Жекамухова, О. Гусейнов, А. Котовская, Нальчик шахарны искусствола школунда юйреннгенле, Каменномостское элни мектебини окъуучулары эшитдиргендиле, жырларын а Культура дворецни  эм элни школларыны ишчилери айтхандыла. М. Котлярова  элни юч мектебине да Инна Кашежеваны назму жыйымдыкъларын саугъалагъанды.