Белгили профессорладан юйрене, саусузланы къутхарыргъа болушады

Нальчикде ёсген къызчыкъ Гузийланы Аминат сабийлигинден да медицинада ишлерге сюйюп, гинжилерине уколла эте, юйдегилени эслерин кесине аз кере бурмагъанды. Ол умутуна жетер ючюн шахарны онючюнчю номерли гимназия школунда иги окъуй, биология бла химия предметлени айырып сюйгенди.

Къудуретни ахшылыгъындан, гитчелигинден да этген мураты толуп, Москвада Россейни халкъланы шуёхлукълары университетини медицина факультетини багъыу иш бёлюмюне (РУДН) киргенди. Анга атасы Алий, анасы Мадина, бирсиле да къууанып, аны уллу шахаргъа кесинлей жиберип къоялмай, биргесине ары кетип, бюгюнлюкде ала да анда турадыла.

Студент болгъан биринчи кюнюнден да таулу къызчыкъ, вузда иги окъугъанындан сора да, анда жыл сайын бардырылыучу Миллет фестивальгъа Къабарты-Малкъарны атындан къатышады. Анда белгили поэтлерибизни назмуларын айта, тепсеулерибизни кёргюзте, бирсилени бизни миллетибизни энчиликлери бла да шагъырейлендиреди.

Бюгюнлюкде Аминат алтынчы курсну таууса турады. Медицинада къайсы ызны сайларыгъына тохташып, келир жыл ординатурагъа да кирир акъылдады. Алай эсе да, ол шёндю да сюйген жумушу бла кюрешеди. Къыралыбызны ара шахарында «Рязанский» атлы терк болушлукъ берген подстанцияда эки жыл чакълы медсестра болуп ишлейди.

Пандемия башланнганлы бери да «къызыл тийреде»  кече-кюн демей, къыйналгъан саусузлагъа себеплик тапдыргъанлай тургъанладан бириди ол. Сау суткала бла ишлей, бир кечеге аланы бригадагъа отуздан аслам жерге жетерге да тюшеди. Айхай да, иш юсюнде аз тюрлю болмайды.  Адамны жашауун сакълап къалыр ючюн кюрешген кезиулери да кёп болады.

Аны бла да къалмай, Аминат коронавирусдан ауругъанланы багъаргъа деп къуралгъан «Крокус Экспо» инфекциялы госпитальда ол ачылгъанлы бери медсестра болуп тургъанды. Мында «къызыл тийреде» ишлей, таулу пациентлеге тюбегени, алагъа болушуп, ыразылыкъ сёзлени эшитгени да болгъанды.

Аны окъуулулугъун, билимлилигин жаратып, госпитальда ишлеген врачла обходха биргелерине алып неда ауругъанла кёп болуп жетишалмагъан чакълада саусузланы халларына къараргъа да айтып тургъандыла. Асламысында больницаны кесинде неда ковидден къыйналгъанлагъа къарагъан медперсонал турурча бёлюннген общежитде къалыргъа да тюшгенди. Къыйналгъанына, юйге тансыкъ болгъанына да къарамай, белгили профессорланы, врачланы къатларында ишлей, аладан юлгю алгъанды.

Ол Нальчикде тургъан ыннасы Мусукланы Буслиматны да коронавирус жугъуп ауруп тургъанын  аны тансыкълап, телефон бла сёлеше туруп ангылап къойгъанды. Алай бла бирси жууукълагъа терк окъуна билдирип, анакагъа (туудукъла уа аны алай айтып къубултадыла) болушлукъ оздурулмай этилирча болгъанды.

Солуу заманда юйге келсе да, эм алгъа ол аммасын жокълайды. Огъары Малкъаргъа, Къара-Суугъа ата-ана жууукъларына барыргъа да сюйюучюдю. Бюгюнлюкде къыйын ауруугъа къажау сюелген медсестраладан бири болгъан таулу къызчыкъ, окъууун да андан ары бардырып, келир заманда сюйген иши бла кюреше, таныулу, билимли, ышаннгылы да врачларыбызны тизмесине къошулур деп ышанабыз.

ТРАМЛАНЫ Зухура.
Поделиться: