Школ оркестрде сокъгъаны – бек жарыкъ сабий эсгериу

Малкъар халкъ зор бла кёчюрюлген кюннге

Солтанланы Назирни жашы Оюс сабийлиги тас болгъан тёлюденди. Анга таулу миллет зор бла туугъан журтундан кёчюрюлгенде, жаланда тёрт жыл толгъан эди. Ол юйюрю бла эрттегили таулу элден Шыкъыдан  кёчюрюлгенди.

Атасы Назир ол кезиуде колхозгъа башчылыкъ этгенди, алай Уллу Ата журт уруш башланнганда аны эркинлигин къорууларгъа кетген биринчи жашланы арасында болгъанды, Сталинградны, Симферопольну, Восток Пруссияны, кёп башха жерлени къоруулау сермешлеге къатышханды.

Солтанланы юйюр Жамбул областьны Меркен районуну Кузьминка элине тюшгенди. Тёртжыллыкъ сабийни эсинде кёп затмы къаллыкъды? Анасыны къыйналгъаны, кеси сынагъан ачлыкъ... «Биз анда оруслуланы ичине тюшген эдик, аны хатасындан а таулу тилге да кереклисича юйреналмагъанма», - дейди ол.

Киши жеринде эгешчигин тас этгенини юсюнден эсгергенинде уа, акъсакъалны кёзлери жилямукъдан толадыла. Акъылбалыкъ болмагъанына да къарамай, Оюсха чюгюндюр ёсдюрюрге тюшгенди, кеси да жашладан къуралгъан звеногъа таматалыкъ этгенди. «Анам хар кюн да ишге жюрюгенди, кече арып келиучю эди. Къарындашым бла анга къолдан келгенича болушургъа кюрешгенбиз», - дейди ол.

Аны бек жарыкъ сабий эсгериую – школда духовой оркестрде согъаргъа юйреннгениди. Аны да кёчгюнчю немисли ачхан эди. «Биз байрамлада, концертледе адамланы аллында согъуучу эдик. Школну бошагъанымда выпускнойгъа оркестр бла барама. Ма ол болур сабийлигими бек жарыкъ кезиую. Тенглерим алай къууаннган эдиле ол кюн»,-дейди  ол.

Оюс Назирович физика-математика билим алып, Ново-Николаевка, Гранитогорск  элледе устазлыкъ этгенди. Ата журтха къайтхандан сора уа кёп жылланы Хушто-Сыртда, Хасанияда, Шалушкада математикадан бла физикадан устаз болуп ишлегенди, ёсюп келген тёлюню юйретиуге, илмугъа жол ачыугъа себеплик этгенди. Аны устаз стажы 45 жылгъа жетеди. Юй бийчеси Салихат бла юч жашны ёсдюрюп, алагъа да бийик билим бергендиле. Бюгюнлюкде уа ол пенсиядады.