Предпринимательствону айнытыуда инсан тирилик изленеди

Къабарты-Малкъарны Жамауат палатасында «Бизнес, власть, жамауат: бирге ишлеуню технологиялары» деген темагъа «тёгерек стол» болгъанды. Анда бизнесни бла коммерциялы болмагъан организацияланы (НКО), халкъны араларында байламлыкъланы тохташдырыуну эм кючлендириуню, социал эм жаш тёлю предпринимательствону айнытыуну амаллары, экономиканы ковидден сора болуму сюзюлгендиле. Жыйылыугъа Москвадан, Саратовдан, Санкт-Петербургдан къуллукъчула, бизнесменле, политикле, Мичуринскден Къырал службаны эм управленияны институтундан «Экономическая политология» программаны ётген выпускникле къатышхандыла. Ала бизнес-проектлени тамамлауда ахшы сынамны, социал, экология эм жаш тёлю предпринимательствону къалай игидендирирге боллугъуну юсюнден оюмларын билдиргендиле.

Къырал власть эм жер-жерли самоуправление органла социал жумушланы тамамлагъан НКО-ла бла байламлыкъла къалай жюрютюрге боллукъларыны юсюнден айта, Халкъ мюлкню бла къырал службаны россейли академиясыны профессору Людмила Ильичева, бек алгъа, регионлада низамны тохташдырыргъа кереклисин белгилегенди.

- Субъектлени кеслеринде бизнесни айнытыргъа тийишлиди: проектлени жарашдырыргъа, «Приоритеты роста» дегенча конкурслагъа къатышыргъа. Бу эришиуню баш мураты жаш тёлюню къыралыбызда экономиканы тохтаусуз айнытыргъа энчи концепцияны жарашдырыугъа къатышыргъа кёллендириудю. Аны чеклеринде башха-башха вузланы студентлери бир бирлери бла ушакъла бардырырча майданла къураладыла, ала усталыкъларын ёсдюрюуде тенглерини сынамларын кёредиле, кеслерини жетишимлерини юсюнден да билдиредиле. Алагъа эм сейир проектлени бла башламчылыкъланы жашауда бардырырча себеплик этиледи, - деп белгилегенди профессор.

Къабарты-Малкъарны цифра айнытыу жаны бла министрини орунбасары Бёзюланы Аскер а аланы ведомстволарына салыннган борчланы юслеринден доклад этгенди. Ол чертгенича, бюгюнлюкде регионланы энчи, къыралны да саулай айныуу цифра технологияла бла къысха байламлыды. Къырал управленияда, бизнесде да тюрлениу изленеди. Бу жаны бла министерствобуз адамланы башламчылыкъларын, бизнес-умутларын толтурургъа болушургъа хазырды», - дегенди ол.

«Ишчи Россей» биригиунюё регионда бёлюмюню жаш тёлю бизнес школуну юйретиучюсю Гузеланы Индира уа быллай тюбешиулени магъанасы уллу болгъанын, алада не бек сейир кёрюннген башламчылыкълагъа да эс бурулгъанын эм жаш адамлагъа муратларын толтурурча уллу онгла берилгенлерин белгилегенди.

Жыйылыуну къурагъан – палатаны маданият эм асламлы информация органла жаны бал комиссиясыны келечиси Юлия Ордокова, «тёгерек столну» эсеплерин чыгъара, бюгюнлюкде социал-экономиканы бардырыуда властьланы, бизнесни бла граждан обществону институтларыны бир бирлерини алларында жууаплылыкълары ёсгенин, ол а жамауатда тынчлыкъны сакълагъан мурдор болгъанын эсгертгенди. Ол чертгенича, бусагъатда къырал инсаннга бизнесин айнытырча онгла къурайды, билим берген организацияла да хакъсыз юйретирге окъуна хазырдыла. Быллай болумлада предпринимательство бла байламлы кёп-тюрлю муратланы толтурургъа амалла чыгъадыла. Адамладан а жангыз да башламчылыкъ, тирилик бла итиниулюк изленедиле.

Ахырында жыйылгъанла юйретиу семинарлада тюбеширге келишгендиле, деп билдиргендиле Жамауат палатаны пресс-службасындан.