Тренерлеринден ахшы юлгю ала, даражалы эришиуледе хорлайдыла

Былтыр Элбрус районну олимпиада резервли спорт школу ишлегенли 20 жыл толгъанды. Ол ачылгъанлай окъуна, умутландыргъан гёжефлени хазырлагъаны бла республикада, къыралда да белгили болгъанды. Анда жарауларын эки Олимпиаданы кюмюш эм доммакъ призёру Аккайланы Хаджимурат, Россейден каратеден дунияны биринчи чемпиону Аслан Губашиев, 2002 жылда къыралны эм иги каратечиси Руслан Сижажев, Россейни, Европаны бла дунияны чемпионатларында бла кубокларында, даражалы халкъла аралы турнирледе хорлагъан кёп спортчула башлагъандыла. Аланы араларында Россейни спортуну сыйлы устасы, спортну халкъла аралы 14 устасы, спортну 52 устасы бардыла. 

Школда ауур атлекадан, каратеден, боксдан, футболдан, волейболдан, баскетболдан бёлюмле къуралгъандыла. Анда эм элледеги филиалларында юйретиу эм жарау этдириу ишни 25 тренер бардырадыла, аланы асламысыны-бийик усталыкъ билимлери, сегизини да бийик квалификация категориялары барды, бири Россейни сыйлы тренериди, ючеулен да республиканы физкультурасыны эм спортуну сыйлы ишчилеридиле. Бюгюнлюкде школгъа жараугъа 562 жаш эм абадан спортчу келедиле, аладан тёртюсю спортну халкъла аралы усталарыдыла, онбешиси-спортну усталарыдыла, жыйырма бири – спортну устасына кандидатладыла, дагъыда жыйырмасыны биринчи разрядлары барды. Спорт-саулукъ кючлеу, башланнган хазырланыу, юйретиу-жарау этиу, спорт усталыкъны игилендириу бёлюмле къуралгъанларыны хайырындан спортчуланы башха-башха тёлюлерини араларында байламлыкъла кючленедиле.    

Школну директору, КъМР-ни физкультурасыны эм спортуну сыйлы ишчиси Чеченланы Арсен билдиргеннге кёре, жаш фахмулу спортчула, тренерлеринден ахшы юлгю ала, жетишимли боладыла, алагъа берилген ышаныулукъну алдатмайдыла. Жангыз да 2018 жылда ала иги кесек майдал къытхандыла. Сёз ючюн, ауур атлетчи спортну халкъла аралы устасы Мартин Сабанчиев СКФО-ну чемпионатында хорлагъанды, къыралны чемпионатында бла кубогунда экинчи болгъанды. Жаш атлетчиле Алим Шогенов, Аслан Каскулов, Альберт Кипов,

Ёзденланы Мурат да республика, Россей даражада да атларын айтдыргъандыла, Мурат а дагъыда Москваны жаш тёлю спартакиадасындан да «алтынны» келтиргенди. Кёп заманны жарау этмегенинден сора, спортха къайтып, Рагнета Карданова СКФО-ну чемпионатында хорлагъанды. Спортну ветераны Тоторкъулланы Заур а кесини жыл санында дунияны пауэрлифтингден чемпионатында алчы болуп къууандыргъанды. 

Каратечиле да жетишимлери бла ёхтемлендиредиле. Былтыр спортну устасы Вера Ковалёва Россейни чемпионатында алтын майдалны алгъанды. Тебуланы Мырза-Бек къыралны чемпионатында – экинчи, «Петербургская весна» битеуроссей эришиуде – биринчи эм «А» класслы халкъла аралы турнирде да биринчи жерлеге чыкъгъанды.  Тенгиз Калдани СКФО-да, халкъла аралы эм «Кавказны кубогу» деген битеуроссей эришиуледе хорлагъанды, онтёртжыллыкъ Керим Алихаджиев Россейде ючюнчю болгъанды. Боксчу Бабаланы Башир да къыралда эм кючлюлени  санына киргенди. 

Сагъынылгъан спортчуланы тренерле Маккаланы Махти, Гергъокъланы Ахмат, Муаед Шаов, Евгений Могилевец, Руслан Нахушев юйретедиле.