Тёртеулен медиклеге жетдирилгендиле

Право низамны сакълаучула «Кавказ» федерал трассада аварияны сылтауларын сюзедиле. Бу жарсыулу болумда бир адам ауушханды, тёртеулен саулукъ сакълау учреждениялагъа жетдирилгендиле.

 Быйыл 9 февральда эрттенликде 10 сагъатда «Кавказ» федерал жолну 4128 километринде «ВАЗ-11730» эм «ГАЗ-3302» машинала къагъышхандыла. ВАЗ-ны водители - 34-жыллыкъ зольскечи Пятигорскдан Владикавказ жанына бара болгъанды. Алай ол болжаллы халда салыннган жол белгини басып, сол жанына чартлагъанды. Алайда ол жол буруугъа урулгъанды, ызы бла  аллына келе тургъан «ГАЗ-3302» бла къагъышханды.

Аварияда алгъан жаралары  ауурдан, ВАЗ-да келген 33-жылллыкъ тиширыу ауушханды. Машинаны водители, аны биргесине келген энтта эки адам (25-жыллыкъ къыз бла 30-жыллыкъ жаш) саулукъ сакълау учреждениялагъа жетдирилгендиле. ГАЗ-да келген 37-жыллыкъ эр киши да жаралары бла медиклеге берилгенди.

Право низамны сакълаучула  водительлени жолда жюрюуню жорукъларын сакъларгъа,  сакъ болургъа, кеслерини эмда жолда жюрюуге къатышханланы саулукълары, жашаулары ючюн  жууаплылыкъны унутмазгъа чакъырадыла.