Къабарты-Малкъарны Башчысыны стипендияларына 50 адам тийишли болгъанды

РАН-ны Къабарты-Малкъар илму арасыны, КъМКъУ-ну, КъМКъАУ-ну, СКГИИ-ни да  студентлерини бла аспирантларыны къаууму – битеу да 50 адам -  илму жетишимлери ючюн ахча саугъалагъа тийишли болгъандыла. 

Битеуроссей эмда халкъла аралы олимпиадалада, чыгъармачы конкурслада бла фестивальлада хорлагъан жаш алимлеге республиканы Башчысыны стипендиялары тохташдырылгъанларыны юсюнден шагъатлыкъ къагъытланы КъМР-ни Башчысыны Администрациясыны таматасы Мухамед Кодзоков КъМР-ни Жарыкъландырыу, илму эмда жаш тёлюню ишлери жаны бла министерствосунда бардырылгъан къууанчлы жыйылыуда бергенди.

Саугъаланнганланы араларында  Дондагъы къырал техника университетни, РФ-ни Президентинде Халкъ мюлкню бла къырал къуллукъну россейли академиясыны, Пятигорскну къырал университетини да аспирантлары бла студентлери болгъандыла.

РАН-ны Къабарты-Малкъар илму арасыны аспиранты Мадина Бакова, башхаланы атлары бла ыразылыгъын билдире, былай дегенди: «Манга бу стипендияны берирге тийишли кёрген эселе, ол жаланда алгъа КъМКъУ-да, ызы бла КБНЦ-ни илму-билим бериу арасында арымай-талмай ишлегеними хайырынданды. Манга насийхатчыларым да уллу къыйын салгъандыла, аны ючюн алагъа энчи ыспас этеме».

Республиканы Башчысыны аты бла берилген ахча саугъаны илму тинтиуле бардырып, жетишимле болдургъан, окъууда айырмалы болгъан, эки эм андан да кёп жангычылыкъ ачыкълагъан, Россейни ара изданияларында илму статьялары чыкъгъан студентле бла аспирантла алыргъа боллукъдула.