Конференцияла, мастер-классла, ушакъла

РФ-ни Президенти Владимир Путинни буйругъу бла быйылгъы жыл Илмуну эмда технологияланы жылына саналады. Анга жораланнган тёрели «Илмуну ыйыгъы» бу кюнледе Къабарты-Малкъар къырал аграр университетде бардырылып бошалгъанды. Беш кюнню ичинде агровузда окъугъанла, преподавательле да алагъа къошулуп, жыйырмадан артыкъ конкурсла, тюрлю-тюрлю кёрмючле, мастер-классла эмда башха жумушла бардырылгъандыла.

Студентлеге деп республикада белгили специалистле, университетни преподавательлери да тренингле, ачыкъ лекцияла, мастер-классла къурагъандыла. Алада Россейде, тыш къыраллада да илмуну кёп жанлары бла тинтиуле къалай баргъаны сюзюлгенди. Бу ишни кезиуюнде аслам кесек семинарла, тюбешиуле, вебинарла да болгъандыла.

«Илмуну ыйыгъы» биринчи февральда агрономия факультетде «Эл мюлк продукцияны производствосунда эмда аны жарашдырыуда жангы технологияла: студентлени къоллары бла этилген саулукълу ашла» деген кёрмючден башланнганды. Ары келгенле университетни жаш алимлерини жетишимлери бла шагъырейленнгендиле, саулукълу аш этиу илму жаны бла сынам алгъандыла.

Ахырында уа «Аграр илмуну шёндюгю проблемалары: прикладной эмда тинтиу аспектле» деген ат бла эки кюнлюк илму-сынам конференция бардырылгъанды. Анга бийик билим берген 42 учрежденияны, онбир (ол санда экиси тыш къыралдан) илму-излем организацияны келечилери къатышхандыла. Аны пленар кенгешинде КъМР-ни жарыкъландырыу, илму эмда жаш тёлюню ишлери жаны бла министрини къуллугъун толтургъан Анзор Езаов бла вузну ректору Аслан Апажев да сёлешгендиле. Анда  былтыр илму-излем ишледе жетишимле кёргюзтген КъМКъАУ-ну студентлерин, аспирантларын эмда ишчилерин грамотала бла саугъалагъандыла.

Конференцияны экинчи кесегинде сегиз секцияны иши бардырылгъанды. Алада АПК-ны инновацияла жаны бла айнытыуда экономикалы проблемаланы, шёндюгю зооветеринария илмуну тамблагъы кюнюню, жамауатха аш хазырлагъан бёлюмде, сатыу-алыуда, туризмде, эл мюлк продукцияны жарашдырыуда эмда сакълауда жангы амалланы юсюнден сёлешгендиле. Аны бла бирге гуманитар илмуланы эмда башха магъаналы темаланы юсюнден да ушакъ бардыргъандыла.