Бизнесге болушууну амаллары сюзюлгендиле

Гитче эм орта бизнесни айнытыу жаны бла къырал корпорация  финансла, гарантияла эм лизинг бла болушууну амалларыны юсюнден КъМКъУ-да семинар бардырылгъанды. Анга толтуруучу эм жер-жерли власть  органланы, гитче эм орта бизнес бла ишлеген организацияланы, «Корпорация «МСП» биригиуню келечилери, предпринимательле, алимле, студентле эмда башхала къатышхандыла.

- Гитче эм орта бизнесни айнытыугъа къырал аслам эс бурады.  Власть органланы келечилери  ишлерин энди башлай тургъан предпринимательлеге проектлерин жашауда бардырыргъа болушур муратда республиканы бизнесменлери бла байламлыкъда ишлейдиле. Бу жаны  бла  «МСП» корпорацияны келечилери да уллу иш бардырадыла, - дегенди  КъМР-ни Правительствосуну Председателини биринчи орунбасары - эл мюлк министр  Сергей Говоров.

«Корпорация «МСП» биригиуню регионланы айнытыу дирекциясыны таматасы  Андрей Чуев Къабарты-Малкъар ала юйретиу семинар бардыргъан биринчи регион болгъанын белгилегенди. «МСП Банк» бизнесменлеге болушур ючюн биз аланы проектлери бла шагъырейленирге керекбиз. Сагъынылгъан корпорация уа ала ючюн гарантия берирге тийишлиди. Лизинг проектлени да къыйматлыгъа санайбыз. Аланы жашауда бардырыргъа себеплик этген лизинг компания ишлейди.  Биз кредитлени жылгъа 6-8 процентге берирге хазырбыз. Бюгюнлюкде андан учуз не хазна табылсын», - дегенди ол.

Гарантия эм финансла жаны бла корпорация бла МСП банк  этген болушлукъну юсюнден бёлюмню таматасыны кенгешчиси Алина Шекихачева толуракъ айтханды. Тюрлю-тюрлю темалагъа «тёгерек столла» да ишлегендиле.  Анда «МСП» программаларына  къатышырча документлени хазырлауну, лизинг жаны бла келишимле къурауну  эмда башха затланы юсюнден айтылгъанды. Бусагъатда республикада «МСП» эм «МСП Банк» бла келишиулюкде  жетишимли ишлеген «Отбор», «Скай Трейд», «Нальчик-Сладость» предприятияла да юлгюге келтирилгендиле.

Ахырында финансла, гарантия эм лизинг жаны бла болушлукъ изленнген бизнес-проектлени презентациясы болгъанды. Семинарны экинчи кюнюнде уа  предпринимательлеге проектлерин тамамларгъа  болушлукъ бериуню, анга къаллай документле керек болгъаныны юсюнден тюбешиуле ётгендиле.