Таш болуп сакъланнган маймул башны сатады

Белгилисича, Къабарты-Малкъарда жашагъанла, башхала да  «Авито» сайтда уллу багъала салып,  кёп тюрлю  сейир затла  сатадыла - темир, къагъыт  ахчала, алтындан, кюмюшден этилген абериле  эм башха  затла.   Кёп болмай а Нальчикде жашагъан биреулен 1 миллион сомгъа минг жылланы ичинде  таш болуп сакъланнган маймулну башын сатханын билдирип жазгъанды.

Кертиси бла да суратында ол сагъынылгъан  жаныуарны башына аламат ушайды.  Болсада табийгъатда  бир тюрлю сыфатлы  ташла аз тюбемейдиле.  Аланы бирлерин таукел анга-мынга  ушатырча эсе да,  башхалары уа арада кёп  даулашла туудурадыла. Андан  сора да, терк байыкъланыргъа излеген хыйлачыланы  да унутургъа жарамаз.

Къалай-алай эсе да, жерлешибиз товарны юсюнден айтыуунда ол керти болгъанын жазмаса  да,  эрттеден бери  адам къолунда сакъланнганын  чертеди. Аны не тюрлю зат болгъаныны тюзюн а жаланда  эксперт тинталлыкъды.  Ким биледи,  коллекционерлени неда алимлени арасында анга да эс бургъан  табылыр эсе уа!