Аскерде борчун тийишлитолтурургъа хазырды

Тырныауузда ёсген жаш Мызыланы Расул гитчелигинден да форма киерге, офицер болургъа сюйгенди. Бюгюнлюкде республикабыздан тышында билим алгъанларыбыздан бириди. Шёндю ол Санкт-Петербургну тийресинде Петергофда орналгъан аскер институтуну ахыр курсундады. Кеси окъугъан экинчи факультетни (бу вузда бёлюмлени алай белгилейдиле) сыйлы къангасында аны сураты да тагъылады. Ол даражагъа уа мында биринчи кюнден «бешлеге» окъугъаны, низамы ючюн жетишгенди.

Туугъан шахарында лицейни да алтын майдалгъа тауусханды. Бегирек математиканы, тюз илмуланы жаратады. Сайлауун да сагъынылгъан окъуу юй бла аны себепли байламлы этгенди. Бу вузгъа, конкурс уллу болгъанына да къарамай, алай ётгенди. Мураты толгъанына ыразы болгъанында уа, анасы Зарий, тамата къарындашлары Рустам бла Тамерлан аны бла бирге къууанчын юлеше, бютюн уллу жетишимлеге кёллендиргендиле.

Аталары дуниясын алышхан эсе да, жашла хар бири бирер жерде бет жарыкълыдыла. «Къайда тургъанынгы, ары нек келгенинги унутмазгъа тийишлиди. Окъургъа сюймесенг, анга жюрегинг бла берилмесенг, ол тынч боллукъду деп да ийнанмайма», - дейди ушакъ нёгерим кеси уа.

Билимге тартылгъаны бла бирге низамгъа да сакъды. Ол тургъан, окъугъан жериндеги болумлагъа, дуниягъа кёз къарамгъа юйретген преподавательлери Николай Николаевич Назарукга (правоведениядан дерсле береди) бла Сергей Владимирович Муштренкогъа (ол а транспорт къоркъуусузлукъгъа тюшюндюреди) ыспас этеди. Аллай инсанлагъа тюбегени ючюн къадарына ыразыды.

Ала да таулу жашны тирилигин, чёрчеклигин эслегендиле. 2017 жылда Москвада Къызыл майданда Уллу Хорламны кюнюне аталгъан парадха аладан баргъан 200 курсантны санына аны да къошхандыла.

Сагъынылгъан байрамгъа саулайда онюч минг аскерчи къатышханды. Ары барлыкъларын факультетни таматасы Сергей Смирнов билдирген кюнден башлап анга хазырланып тебиреген эдиле. Иги кесек заманны кеслеринде, артда да ара шахарда ай бла жарымны кюрешгендиле.

- Къалай солуругъунгу, атламынгы не кезиуде къалай аллыгъынгы кёлден окъуна билип тургъанлыкъгъа да, парадны кезиуюнде жюрегими къууанч, насып, ёхтемлик да бирге бийлегендиле. Ол сезимлени сёзле бла айтып ангылатхан къыйын эсе да, ала учундургъан чакъла эдиле, - дейди Расул, сагъынылгъан кюнлени эсгере.

Айхай да, къайсы жаш адамны да къадарында быллай тюбешиуле болсала, ала алагъа келир заманнга, алгъа ийнанмакълыкъ бла къараргъа онг бередиле. Мызы улуну муратларындан бири уа тамблагъы кюннге ышанмакълыкъны кючлергеди. Ол хар заманда да болгъанлай турса сюеди. Андан сора уа политика болумну тюрлендирирге, адамланы араларында сууукълукъну кетерирге излейди.

Жашауда кеслерини билимлерине, окъууларына ышаннганланы, ишлеринде профессионалланы жаратады эмда хурметлейди. Жамауатны алгъа элтирикле ала болгъанларына толу ийнанады. Илму бла кюреше, жангычылыкъланы къурагъанлагъа, хар бёлюмде айныр онгла жарашдыргъанлагъа, адамлагъа таплыкъгъа, ырахатлыкъгъа мадарла ачханлагъа ыразыды.

Ушакъ нёгерим малкъар тилни иги билгенин да белгилерчады. Юйге СМС-ле жазса неда телефон бла сёлешсе да, тауча айтады. Биргесине Тырныаууздан,  Нальчикден, Быллымдан, Кёнделенден, бирси жерледен да окъугъан таулу жашла бла тюбешселе да, кесибизча сёлеширге излегенлерин чертеди.

Биринчи кезиуде курсантланы бош заманлары азды. Ючюнчю жылларында ол бир кесек асламыракъ бола башлайды. Бош заманында Расул спорт бла да кюрешеди. Адабиятны сюеди. Анда къайсы жанрны да жаратады, ол неда бу деп айырмай, окъуйду.

Къулийланы Къайсынны, Мечиланы Кязимни назмулары уа анга хычыуундула. Аладан, дагъыда жомакъларыбыздан, таурухларыбыздан аслам затха тюшюннгенин, билгенин айтады. Илму фантастика анга бютюнда сейир кёрюнеди. Алгъаракълада уа Александр Дюманы «Граф Монте-Кристо» романын тауусханды.

Арт кезиуде аскер вузлагъа кирирге сюйгенлени саны иги да ёсгенин эслегенин билдире, ол, баям, артда иш табар ючюн болгъан шартды, дейди. Къыралда экономика болум кёплени сагъайтханын, аскер сферагъа адамла асламыракъ эсни аны ючюн бургъанлары, айхай да, бюгюнлюкде жангычылыкъ тюйюл эсе да, усталыкъны жюрекни излеми бла сайларгъа тийишлисине ийнанады.

Бюгюнлюкде, айтханыбызча, бешинчи курсну таууса тургъан жашны жарыкъ умутлары алдадыла. Окъууун бошаса, быйыл распределение бла жиберликдиле ишлерге. Къайры ийселе да, ары барыр акъылдады. Алай эсе да, аскерчини жолу аныкъы болмагъанын ангыларгъа тюшсе, экономиканы неда инженерликни сайлар муратдады.

Кимден да бег а аны жетишимли, миллетини атын айтдыргъан адам болурун а энди токъсан жылдан атлагъан аппасы Мызыланы Хамзат сюеди. Ол, туудугъу отпускга келир кезиуню ашыгъып сакълай, анга ариу алгъышла этеди.

Бирси жерледе айырмалы окъугъан, юлгюге кёргюзтюлген къызларыбыз, жашларыбыз бла биз да ёхтемленебиз. Кесим демегенни эки эрини бирге жетмейди, дейдиле халкъыбызда. Аны себепли ала ариу къылыкълары, низамлары бла бюгюн къалай айтыла эселе да, тамблагъы кюнде тутхан ишлеринде бийик профессионал даражагъа жетишип, барыбызны да къууандырырла деп ышанабыз.