Адам эм закон

Юйюнде наркотиклени жюрютгенден

Нальчикде УМВД-ны наркотиклеге къажау бёлюмюню къуллукъчулары полицияны участка уполномоченныйлери бла оператив-тинтиу жумушланы кезиуюнде  50-жыллыкъ эр киши кесини юйюнде  танышларына наркотиклени ичерге къойгъанын тохташдыргъандыла. Фатарны тинтгенде, право низамы сакълаучула ичинде акъ тюрсюнлю порошогу бла чулгъам эмда шприц тапхандыла.Экспертиза ол  «метилэфедрон» наркотик болгъанын тохташдыргъанды.

Эр кишиге РФ-ни УК-сыны 232-чи эмда 228-чи статьяларына кёре терслеу материалла ачылгъандыла. Ол притонну къурагъаны неда кесини мекямында дайым да наркотиклени ичерге эркин этгени эмда наркотиклени, психотроп затланы законсуз сатып алгъаны, асырагъаны, жюрютгени, жарашдыргъаны ючюн терсленеди. Алгъын да эр киши сюдню оноуу бла жууапха тартылгъанын белгилерчады.

Хакъ ючюн борч жыйылгъанды

Нальчикни прокуратурасы «Башчылыкъ этген муниципал компания» предприятияда урунуу законла къалай толтурулгъанларын тинтгенди.

 РФ-ни Урунуу кодексини 130-чу статьясында айлыкъ кезиулю  кере тёлениригини болжалларына къырал гарантияла тохташдырылгъандыла. 136-чы статьяда уа хакъ айгъа эки кере берилирге кереклиси жазылыпды.

 Тинтиуледен ачыкъланнганыча уа, предприятияда  44  ишчиге былтыр декабрь ючюн  хакъ  тёленмей, 620 минг сом борч жыйылгъанды. Андан сора да, айлыкъны тёлеу жаны бла актала излемлеге келишмегенлери да ачыкъланнганды. Предприятияны башчысына хакъны заманында  тёлемегени ючюн административ материалла хазырланнгандыла.

 Ичгини эл мюлк фермада чыгъаргъандыла

КъМР-де МВД-ны экономика къоркъуусузлукъ эм коррупциягъа къажау управлениясыны къуллукъчулары, УФСБ-да коллегалары бла бирге Прохладна районну Ульяновское элинде эл мюлк фермада ичги затла чыгъаргъан жашырын ишлеген цехни ачыкълагъандыла.

 Право низамны сакълаучула анда бешлитрлик 62 полимер шеша, ичгиси бла 5 минг мияла шеша тапхандыла. Алада россейли эм тыш къыраллы предприятияланы этикеткалары жабышдырылып, алай федерал маркалары болмагъаны тохташдырылгъанды.

 Аладан сора да, мекямда полимер шешала, шеша башла, ичгини чыгъаргъанда керекли башха оборудование табылгъанды. Экспертиза тохташдыргъаныча, фермада хазырланнганы ичги ГОСТ-ха келишмейди. Битеу да бирге анда 2 тонна ичги сыйырылгъанды, аны багъасы 850 минг сомдан асламды.

 Бу шартла бла байламлы РФ-ни УК-сыны 171.1-чи статьясына кёре терслеу материалла хазырланнгандыла - законлагъа бузукълукъла этилип, федерал маркасыз продукция хазырланнганы, сатып алыннганы, асыралгъаны, сатылгъаны ючюн.
Право низамны сакълаучула жалгъан ичгини чыгъаргъанланы тохташдырыу жумушланы бардырадыла.

    Хыйлачылыкъ ючюн жууапха тартылгъанды

 Быйыл 26 январьда Нальчикде УМВД-ны дежурный бёлюмюне 35-жыллыкъ эр киши келгенди. Ол билдиргенича, аны жууукъларыны танышы анга ишге кирирге болушургъа сёз бергенди. Ол медицина тинтиуледен ётерге керекди деп, 7 минг сом беририн излегенди. Алай заман озгъанда, танышы аны алдагъанын ангылап, право низамны сакълаучулагъа келгенди.

Уголовный розыскны полициячылары, тийишли жумушла толтуруп, хыйлачылыкъ этгенине ишеклини тутхандыла. Ол башы алгъын да сюдлюк болгъан 44-жыллыкъ шахарчыды. Ол этген терслигине женгдиргенди. Эр кишиге РФ-ни УК-сыны 159-чу статьясыны 2-чи кесегине (хыйлачылыкъ)  кёре терслеу материалла ачылгъандыла.

 

Тикаланы Фатима хазырлагъанды.
Поделиться: